लुँ ममीवं व्यवसायीत अलपत्र
येँ (सन्ध्या टाइम्स)/लुँ आयात बन्द जुइवं नेपाल राष्ट्र बैंकं थःके दुगु लुँ बोलकबोल प्रथापाखें मीगु धकाः सुचं जारी याःसां म्हिगः न्हापांगु न्हि हे लुँ मीगु ज्या मजूगुलिं लुँवहः व्यवसायीत तम्वःगु दु ।
नेपाल राष्ट्र बैंकं थःगु स्टक पाखें मंगलवाः पतिकं लुँ १०० किलो व वहः १००० किलो लिलाम यायेगु धकाः उकुन्हुंनिसें सुचं पिकाःगु खः। तर म्हिगः न्हापांगु न्हि हे लिलाम यायेगु ज्या धाःसा मजुल। लुँवहः लिलाम सम्बन्धी गुलिखे नियमावलीत अझ नं तयार मजूनिगु कारणं म्हिगः लुँ मी मफुगु खँ राष्ट्र बैंकं धाःगु दु ।
राष्ट्र बैंकं लिलाम याइगु लुँ न्याये धकाः म्हिगः थीथी जिल्लाया व्यापारीत लखौं तका दां ज्वनाः राष्ट्र बैंकय् वयाच्वंगु खः। तर बैंकं अन्तिम इलय् वयाः लुँ लिलाम जुइ मखुत धायेवं आपालं ध्यबा ज्वनाः वःपिं पिने जिल्लाया व्यापारीत असुरक्षित व अलपत्र जूवंगु खः ।
थ्वहे झ्वलय् नेपाल सुनचाँदी व्यवसायी संघपाखें महासचिव माणिकरत्न शाक्यं थन छगू वक्तव्य पिकासें राष्ट्र बैंकं म्हिगः लुँ पित मबिउगु कारणं व्यवसायीतय्त धोका जूवंगु खँ धाःगु दु। मोहनि थेंज्याःगु नखःया इलय् थःपिनि ज्या त्वःताः येँय् वयाच्वंपिं व्यवसायीत अतिकं मर्माहत जूगु दु धासें राष्ट्र बैंकया थ्व पहःयात खेद प्वंकूगु दु। थुकिं मोहनिया सिजनय् लिच्वः लाइगु खँ नं धाःगु दु ।
