एमाले नेताया छेँय् बम मुल
येँ (सन्ध्या टाइम्स)/नेकपा (एमाले) बर्दिया जिल्ला कमिटीया अध्यक्ष देबबहादुर रानाया छेँय् वंगु चान्हय् बम विष्फोट जूगु दु। गुलरिया नगरपालिका वडा नं. ६ स्थित वय्कःया छेँय् म्हमसिउपिं मनूतय्सं सकेट बम विष्फोट याःगु खँ बर्दियाया प्रहरी ज्याकुथिं धाःगु दु ।
बर्दिया जिल्ला विकास समितिया पुलांम्ह सभापति तकं जुयादीम्ह रानाया छेँय् बमं कयाः सामान्य क्षति जूगु दु। वंगु चान्हय् बम विष्फोट जुइ धुनेवं हे बर्दियाया प्रहरी उपरीक्षक सूर्यप्रसाद उपाध्याय, प्रमुख जिल्ला अधिकारी बेणीमाधव ज्ञवाली लगायतया पुचः वनाः घटनास्थल निरीक्षण यायेगु नापं जिल्लाया सुरक्षा ब्यवस्था कडा याःगु दु ।
उगु घटनायात कयाः माःगु कथं अनुसन्धान यानाच्वंगु दुसा आः तकं सुयातं ज्वने मफुनिगु खँ धाःगु दु ।
