यलं नेवाः वाःपौ पिकायेत पहल
यल (सन्ध्या टाइम्स)/यलं नेपालभाषां छगू न्हूगु वाःपौ पिथनेगु सम्भाव्यता बारे वंगु शनिबाः यलय् छगू अन्तर्क्रिया जुल। ज्याझ्वलय् नेपालभाषाया समाचार ब्वँमिपिं दयेकं नं, पत्रकारिताया ख्यलय् नेवाः जनशक्ति दतं नं विचारप्रधान समाचारपत्र पिहां मवयाच्वंगु विषयय् सहभागीपिंसं चिउताः प्वंकूगु खः ।
नेपालभाषा एकेदमिया चान्सलर सत्यमोहन जोशीं यल देय् परापूर्वकालंनिसें ललितकलाया देश धायेकाच्वनाः नं आःया इलय् यलं पत्रिका छगू हे पिमदनेगु धइगु दुःखया खँ उकिं फुसा न्हिपौ मफुसा आःयात वाःपौ छगू माःगुलिं थुकिया निंतिं थम्हं फुगु ग्वाहालि यायेगु बचं बियादिल।
डा. पुष्पराज राजकर्णिकारं पत्रिका पिकायेगु धइगु भावनां जक सम्भव मजुइगुलिं व्यावसायिक थें ज्या यायेत तयार पुचः माःगु खँ कनादिल ।
यल प्रकाशनया प्रवन्ध निर्देशक शाक्य सुरेनं न्हूदँ दुने निलापौया रुपय् परीक्षण कथं पिकायेत सम्पादकीय पुचः व व्यवस्थापन पुचः तयार जुयाच्वंगु व माःगु गृहकार्य बुलुहुँ न्ह्यानाच्वंगु धयादिल ।
उगु अन्तर्क्रियाय् यलया थ्यंमथ्यं ५०म्ह भाषासेवी व उद्योगपतिपिनिगु सहभागिता दुगु खः ।
