महामन्त्रीलय् सिंह, दांभरीलय् यादव त्यात
नेपाली कांग्रेसया झिंनिक्वःगु महाधिवेशन पाखें प्रकाशमान सिंह महामन्त्री व चित्रलेखा यादव दांभरीलय् निर्वाचित जुयादीगु दु ।
बुधवाः सभापतिया निंतिं मतगणना क्वचायेधुंकाः महमन्त्री व दांभरीया निंतिं जूगु मतगणनाय् कोइराला प्यानलया सिंहं १६५६ मत हयाः देउवा प्यानलया विमलेन्द्र निधि व स्वगू प्यानल कथं दुगु नरहरि आचार्ययात बुकूगु खः । मतगणनाया लिच्वः कथं निधिं १२२६ व आचार्यं १५२ मत प्राप्त याःगु खः ।
उखे दांभरी पदय् धाःसा देउवा प्यानलया यादवं १५५९ मत हयाः थः प्रतिद्वन्दी पद्मनारायण चौधरीयात ल्यूने लाकूगु खः । चौधरीं १४२० मत हःगु खः ।
थ्वस्वयां न्ह्यः सुशील कोइराला १६५२ मत हयाः सभापतिया पद त्याकादीगु खः । आः बिहीवाः सुथसिया ८ बजे निसें आरक्षण कोटाया निंतिं मतगणना जुइसाः आरक्षण कोटाया मतगणना लिपाः जक खुला पाखेया मतगणना याइगु ज्याझ्वः दु ।
