नेपाली कांग्रेसया सभापतिइ सुशील कोइराला त्यात

नेपाली कांग्रेसया सभापतिइ सुशील कोइराला त्याःगु दु । थौं चान्हय् जूगु मतगणनाया लिच्वः कथं कोइरालां १६५२ मत हःगु खःसा वय्कःया निकटतम प्रतिद्वन्दी शेरबहादुर देउवां १३१७ मत हःगु खः । सभापतिया हे उम्मेदवार भीमबहादुर तामाङं धाःसा ७८ जक मत हःगु खः ।

मतदानय् कुतुवंगु कुल मत (३०८८)या ५४ प्रतिशत मत हःया कोइरालां देउवायात ल्यूने लाकूगु खः । २०३७सालय् कांग्रेसया केन्द्रीय दुजः जुयादीम्ह कोइराला पार्टीया महामन्त्री, उपसभापति व लिप्पांगु इलय् कार्यवाहक सभापति जुयादीधुंकल ।

मतगणना बहनी ८ बजे हे जुइगु धाःसां चान्हय् १२ बजे निसें जक न्ह्याःगु खः । मतगणनाया आचारसंहिता बारे विवाद जुइवं निर्धारित ई स्वयां प्यघौ लिबाक मतगणना न्ह्याःगु खः । मतगणनाया झ्वलय् प्रज्ञा भवन पिने तःधंगु ल्याख्य् कोइराला व देउवाया समर्थकतय् ब्वति दुगु खः ।