पुलांम्ह जुजु ज्ञानेन्द्रशाहयात कुमारी पुजाय् ब्वति कायेके मबिल

येँया सुरु जूगु निन्हूया दिं पुलांम्ह जुजु ज्ञानेन्द्र शाह थौं हनुमानध्वाखा वनेगु ज्याझवः क्वःछ्यूगु खःसां सुरक्षाया हुनिं क्यना लिपांगु इलय् ज्याझवः रद्ध याःगु दु । पुलांम्ह जुजु शाहं थौं म्वाःद्यः कुमारीया रुपय् पुज्यानातःपिं पुलांपिं च्याम्ह कुमारी व मेपिं कुमारी मस्तय्त सम्मान यायेगु ज्याभुवः क्वःछिनातःगु खः । सम्मान ज्याझवलय् पुलांम्ह जुजुयात सरकारं नागार्जुनं पिहाँमवयेत इनाप यायेवं नागार्जुन दरवारया अधीकारितय्सं ग्वसाः खलःयात ज्याझवलय् पुलांम्ह जुजुं ब्वति मकाइगु जानकारी ब्यूगु खः ।

म्हिगः यःसिं थनाः विधिवत रुपं जात्रा सुरु याःगु खः । नेपाल संवत् कथं यंलाथ्व द्वादशीया दिं साइत स्वया हनुमानध्वाखा कालभैरव न्ह्यःने थंगु यःसिं नं थौं पुलांम्ह जुजु शाहपाखे पुजा यायेगु ज्याभुवः दुगु खः । सुरक्षा संयन्त्रं वसन्तपुर क्षेत्रय् राजतन्त्रया पक्ष व विरोधीतय्गु जमघट अप्वःगु जानकारी गृहमन्त्रालययात ब्यूगु खः । वयां लिपा गृहमन्त्रालयं वसन्तपुली मवनेत शाहयात इनाप याःगु धाःगु दु । क्वःछिनातःगु ज्याझवः रद्ध जुइवं ग्वसाः खलकं पुलाम्ह जुजु शाहया फोटो तया सम्मान ज्याझवः न्ह्याकूगु खः । पुलाम्ह जुजु शाह हनुमानध्वाखा वनीगु क्वःछ्यूगु खःसां थौं सुथंनिसें राजतन्त्रया समर्थकत वसन्तपुलीइ मुनाः राजतन्त्रया पक्षय् पर्चावाजी तकं याःगु खः ।

स्वनिगलय् तसकं महत्वपूर्ण जात्रा कथं कयातःगु येँया पुन्हिया चतुर्दशी खुन्हू कोहने याःया दिं राष्ट्रप्रमुखया हैसीयतय् जुजुं हे म्वाःद्यः कुमारी भैरव व गणेशया विशेष पुजा याना जक जात्रा सुरु याइगु परम्परा दुगु खःसा निद न्ह्यः निसें राष्ट्रप्रमुखया रुपय् राष्ट्रपति डा. रामवरण यादवं विधिवत रुपय् कुमारीया दर्शन व पूजा याना परम्परायात न्ह्याकाच्वंगु दु ।