कांग्रेसया नीति व ज्याझ्वः पारित
नेपाली कांग्रेसया झिंनिक्वगु महाधिवेशनया थौं प्यन्हूया न्हि कुन्हु म्हिग बन्द सत्रय् पेस याःगु थीथी प्रस्ताव नापं नीति व ज्याझ्वः पारित याःगु दु । दक्वं जिल्लाया सभापतितय् सुझाव कथं नीति व ज्याझ्वः परिमार्जन सहित पारित याःगु खः ।
बन्द सत्रय् म्हिगःनिसें पार्टीया नीति व ज्याझवः बारे सहलह न्ह्याःगु खः । बन्द सत्रय् जिल्लाया सभापतितय्सं वरिष्ठ नेता शेरबहादुर देउवां पेस यानादिगु पार्टीया नीति व ज्याझवःलय् थःथःगु बिचाः तःगु खः । नीति व ज्याझ्वःया बारे जिल्लाया सभापतितय्सं कार्यान्वयन यायेमाःगु खँय् बः ब्यूगु खः । शान्ति प्रक्रिया व संविधान निर्माणया निंतिं कांग्रेसं सरकारया नेतृत्व कायेमाःगु सुझाव नं इमिसं ब्यूगु खः ।
कन्हय् महाधिवेशनया लिप्पांगु न्हि ६४सिटया निंतिं ३४०म्ह नेतात दथुइ धेंधेंबल्ला जुइत्यंगु दु । मतदान कन्हय् सुथय् ८ बजे निसें न्हिनय् ४ बजे तक जुइगु ज्याझ्वः दु ।
