'पौडेलं उम्मेदवारी लितकायेधुंकाः जक न्हूगु प्रकृया'
सभामुख सुभाषचन्द्र नेम्वाङं प्रधानमन्त्रीया उम्मेदवार रामचन्द्र पौडेलं उम्मेदवारी लितकायेधूंकाः जक न्हूगु प्रकृयाय् वनेफइगु खँ धयादीगु दु ।
सोमवाः सुथय् समसामयीक राजनीतिक अवस्थाया बारे सहलह यायेत एनेकपा (माओवादी)या अध्यक्ष पुष्पकमल दाहाल 'प्रचण्ड'या न्हू बजारय् च्वंगु छेँय् थ्यंकादीम्ह नेम्वाङं प्रधानमन्त्री ल्ययेगु निंतिं मेगू प्रकृयाय् वनेत प्रधानमनत्रीया निम्हं उम्मेदवारं नां लितकायेमाःगु खँ धयादिल ।
माओवादी अध्यक्ष प्रचण्डं राजनीतिक सहमतिया निंतिं थःम्हं उम्मेदवारी लितकयाःगु धयादिसें संसदया नियमावली संशोधन यानाः न्हूगु प्रकृयाय् वनेत सभामुखयात इनाप यानादीगु खः । लिसःलय् नेम्वाङं निर्वाचन प्रकृया न्ह्यानाच्वंगु व अझ नं छम्ह उम्मेदवारं नां लितमकानीगु अवस्थाय् संसदीय नियमावली संशोधन यायेगु मिले मजुइगु खँ धयादीगु खः ।
