शान्ति प्रकृया छपलाः न्ह्यने : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' अनमिनया म्याद थप लिपा नेपाःया शान्ति प्रकृया छपलाः न्ह्यने न्ह्याः वंगु खँ धयादीगु दु । वय्कलं माओवादीया पहलय् अनमिनया म्याद थप जूगु धयादिसें लडाकुयात विषेश समिति मातहत ह्येगु सहमतिया कारणं जनाताय् सकारात्मक सन्देश वंगु धयादिल ।
रामराजा सिंहया जनवादी मोर्चा व नेकपा एकीकृत युवाः संघ पाखें माओवादीइ प्रवेश याःपिंत लसकुस यानादिसें वय्कलं शान्ति प्रकृयायात बचे यायेत एमाले नाप स्वंगू बुँदे सहमति यानाःगु धयादिसें आः कांग्रेस महाधिवेशन लिपा सहमतिया निंतिं कांग्रेसनाप खँल्हबंला यायेगु धयादिल ।
वय्कलं मेगू संसदीय निर्वाचनय् माओवादीं दुई तिहाई बहुमत हइगु दावी यानादिल । वय्कलं माओवादीया दुई तिहाई वइगु जूगुलिं हे मेमेगू दलं षड्यन्त्र सुरु याःगु धयादिल ।
पार्टी मू ज्याकू कोटेश्वर पेरिश डाँडाय् जूगु ज्याझ्वलय् जनवादी मोर्चाया उपाध्यक्ष दीनानाथ भण्डारी, कृष्णकुमार राई लगायत २५म्हेसित प्रचण्डं सिंन्ह तकाः लसकुस यानादीगु खः ।
