बन्द सत्रय् नीति व ज्याझ्वलय् सहलह
नेपाली कांग्रेसया झिंनिक्वगु महाधिवेशनया स्वन्हू न्हि थौं बन्दसत्रय् पार्टीया नीति व ज्याझवःलय् सहलह जूगु दु ।
कांग्रेस वरिष्ठ नेता शेरबहादुर देउवां पेश यानादीगु पार्टीया नीति व ज्यझ्वः नापया दस्तावेजया विषयसं थौं सहलह सुरु याःगु खः । कांग्रेसं फुक्क पुलांगु व छुंछुं न्हूगु कार्ययोजना नापया नीति तयार याःगु दु । नीतिइ समाजवाद, राष्ट्रियता, प्रजातन्त्र, संघीयता, शासकीय स्वरुपया बारे व्याख्या यानातःगु दु । अथेहे वर्तमान राजनीतिक परिस्थितिइ नेपाली कांग्रेसया बिचाः, आर्थिक-सामाजिक नीति व ज्याझ्वः, कांग्रेसया अन्तरराष्ट्रिय सम्बन्ध व परराष्ट्र नीति व कांग्रेसया संगठन व सुदृढीकरण सम्बन्धी विषय समावेश यानातःगु खः ।
५६गू पृष्ठ ताःहाकगु मस्यौदाय् कांग्रेसं वंगु दिनय् याःगु कमजोरीया समीक्षा याना पार्टीयात न्हूगु गति बीगु सार न्ह्यथनातःगु दु । दस्तावेजय् समाजवादया निंतिं उत्पादन वृद्धि यायेमाःगु व उत्पादन वृद्धि मजुसें समाजवादया लक्ष्य हासिल मजुइगु खँ नं न्ह्यथंनातःगु दु ।
अथेहे कांग्रेसं राष्ट्रियता पञ्चशीलया सिद्धान्तय् आधारीत स्वतन्त्र विदेश नीतियात बः ब्यूगु दु । कांग्रेसं दस्तावेजय् भारत व चीनया सुरक्षायात च्यूताया विषय दयेकूगु दु । नीति व ज्याझ्वलय् पुचःगत सहलह यानाःसंशोधन सहित पारित यायेगु व न्हूगु नेतृत्वया चयन यानाः असोज ५ गते पार्टीया महाधिवेशन क्वचायेकीगु ज्याझ्वः दु ।
