कांग्रेसपाखें अग्राधिकार अस्वीकार

येँ (सन्ध्या टाइम्स)/नेपाली कांग्रेसया न्ह्यानाच्वंगु महाधिवेशनं जातीय, भाषिक अग्राधिकारयात तप्यंक हे अस्वीकार याइगु जूगु दु। कांग्रेसं पेश याइगु थःपिनि नीति तथा कार्यक्रमय् अग्राधिकारयात अतिवादी धइगु द्वपं बिसें उकियात स्वीकार याये मफइगु खँ धयातःगु दु। थ्व नीति तथा कार्यक्रमया प्रतिवेदनय् थौं सहलह जुइ। उगु प्रतिवेदनय् संविधानसभाया राज्य पुनर्संरचना नापं राज्यशक्तिया बाँडफाँड समितिया सभापति एकीकृत माओवादीयाम्ह जूगुलिं बलपूर्वक जातीय, भाषिक अग्राधिकार लगायत झिंप्यगू प्रदेशया प्रस्ताव यंकूगु खः धयातःगु दु। कांग्रेसं न्हापांनिसें जाति, भाषाया आधारय् स्वायत्त प्रदेश दयेके फइ मखु धया वयाच्वंगु खँ न्ह्यथँसें आः स्वायत्त प्रदेश दुने बरु विशेष क्षेत्रत निर्माण यायेफइ धयातःगु दु। थ्व ल्याखं यदि कांग्रेसया उगु नीति तथा कार्यक्रम पारित जुल धाःसा कांग्रेसया नेता व कार्यकर्तात अग्राधिकार सहितया नेवाः स्वायत्त राज्यया पक्षय् न्ह्यानाच्वंगु आन्दोलनय् वयेत तकं नैतिक संकट वयेफुगु खँ धाःगु दु ।