आः प्रम चुनावय् छु जुइ?
येँ (सन्ध्या टाइम्स)/नेपाली कांग्रेसया महाधिवेशनयात सन्देश कथं एमाले व माओवादीं आः थःपिं निम्हं हे प्रधानमन्त्रीया चुनाव प्रक्रियां पिहां वयेगु धकाः याःगु सहमतियात औपचारिक रुपं लिसः बीगु फुर्सद कांग्रेस नेतातय्के मदयाच्वन तिनि। तर अथे खयां नं कांग्रेसया सुशील कोइराला पक्षं सहमतिइ हे वनेगु खःसां नं माओवादीया नेतृत्वयात थःपिंसं स्वीकार याये मखु धकाः धाःसा धायेधुंकूगु दु। देउवा पक्षं आःतक न्ववाःगु मदुनि। उकिं छुं जुयाः महाधिवेशनय् देउवा पक्ष त्यात धाःसा कांग्रेसं काःगु थ्व बिचाः हिले फुगु दावी सूत्रं याःगु दु ।
एमाले व माओवादीया नेतात च्वनाः थज्याःगु निर्णय याःगु खँयात थन पर्यवेक्षकतय्सं धाःसा थीथी मिखां स्वया हःगु दु। छुं ई न्ह्यः भारतीय दूत श्यामशरण नेपाः वयेवं थनया थीथी मधेशवादी दलतय्त छप्पँ याना थकूगु खः। थुगुसी नं छगू चिनियाँ प्रतिनिधि मण्डलं नेपाः भ्रमण याना वंगु खःसा उपिं लिहां वनेवं हे एमाले व माओवादी नेतात छगू सहमतिइ वयेत तयार जुल। चिनियाँ नेतातय् नेपाः भ्रमण व माओवादी�एमालेया दथुइ जूगु थ्व सहमति केवल संयोग जक मखु जुइमाः धकाः नं थना अनुमान याना हःगु दु ।
एमाले-माओवादी दथुइ जूगु थ्व सहमतिं यानाः आः प्रधानमन्त्रीया चुनाव जूसां उकिया अर्थ मदया बिउगु जक मखु उकुन्हु तक चुनावया मू केन्द्रय् लानाच्वंगु मधेशवादी पार्टीतय् मत नं निरर्थक साबित जूगु दु। प्रधानमन्त्रीया चुनाव असोज १० गते जुइत्यंगु दु ।
