दुर्गालालया 'इलंहाःगु म्ये' पिदन
नेवाःतय्त सांगीतिक रुपं जागृत यायेगु ताः तयाः जनकवि दुर्गालाल श्रेष्ठया न्हूगु म्येचाः 'इलं हाःगु म्ये' पिदंगु दु। धर्मोदय सभाया सचिव सुचित्रमान शाक्यं पिथनादीगु उगु एल्बम म्हिगः नेवाः जागरण मञ्चया ग्वसालय् जूगु छगू ज्याझ्वःया दथुइ विमोचन जुल ।
मूपाहां संस्कृतिविद् सत्यमोहन जोशी नापं सभासद्पिं डा.मंगलसिद्धि मानन्धर, बुद्ध साय्मि, हितमान शाक्य, दिलीप महर्जन, भाषासेवीपिं पद्मरत्न तुलाधर, मल्ल के. सुन्दर, लक्ष्मण राजवंशी, हितकरवीर सिं कंसकार, फणिन्द्ररत्न वज्राचार्य, सुचित्रमान शाक्य, कृष्णगोपाल श्रेष्ठ, सुजीव वज्राचार्य, विजयरत्न असंबरे, दिल बहादुर श्रेष्ठ, रामकृष्ण मानन्धरपिंसं मंकाः कथं उगु एल्बमया विमोचन याःगु खः ।
पीगुम्ह कलाकारपिनिगु सहभागिताय् झिंप्यपु म्ये दुथ्याःगु उगु एल्बम नेवाः राष्ट्रिय भावनां जाःगु म्येया संकलन खः। ज्याझ्वलय् सानुबाबु महर्जनं 'दने धुन....' म्ये हाःगु खःसा पवित्र कसां 'बुद्ध जुइ म्वायेक हे हाय...' म्ये हालाः सकसितं भावुक याना बिउगु खः ।
ज्याझ्वलय् न्ववासें मूपाहां सत्य मोहन जोशीं 'इलं हाःगु म्ये' थौंया ईया उपलब्धी खः धयादिल ।
पिकाक सुचित्रमान शाक्यं पौष ११ गतेया नेवाः राज्य घोषणा ज्याझ्वःयात हःपाः बीगु कवि दुर्गालाल श्रेष्ठया भावनायात थम्हं ग्वाहालि जक यानागु खः धयादिल। थ्व म्येचाः पिकयाः थः झिदँ लिपा हानं नेपालभाषा ख्यलय् दुहां वयागु खँ कनादिल ।
कवि दुर्गालाल श्रेष्ठं नेवाःतय्त सदां सदां जागृत यायेगु ताः तयाः थुगु म्येचाः पिथनागु खँ कनादिल। अन हाःगु म्ये न्यँन्यं हे अतिकं भावुक जुयादीम्ह पद्मरत्न तुलाधरं मिखाय् ख्वबि हुहुं थौंया नेवाःतय् अवस्था बारे कनादिल।
नेवाः जागरण मञ्चया नायः सुजीव वज्राचार्यया सभापतित्वय् जूगु उगु ज्याझ्वलय् संकिपा मञ्चया नायः विजयरत्न असंबरें लसकुस यानादीगु खः ।
