मौलिक भूमिसूधार नालाकायेमाः : प्रधानमन्त्री

प्रधानमन्त्री पुष्पकमल दाहाल प्रचण्डं भूमिसुधार मजूतल्ले स्थाई शान्ति सम्भव मजूगु खँ धयादीगु दु ।

मंगलवाः येँय् शुरु जूगु भूमिसुधार सम्बन्धी अन्तराष्ट्रिय सम्मेलनया उल्लेज्या यानादिसें प्रधानमन्त्री दाहालं मेमेगू देय्या नक्कल मयासें थःगु हे मौलिक भूमिसुधार नालाकायेत बः बियादिल । वयेकलं उच्चस्तरीय भूमिसुधार आयोगं खुलाः दुने सुझाव लःल्हाइगु व वहे कथं भूमिसुधार सम्बन्धि ठोस ज्या न्ह्यावनीगु खँ धयादिल ।

ज्याझ्वलय् प्रधानमन्त्री दाहालं भूमिसुधार आन्दोलन न्ह्याःगु तःदँ लिपाः जुसां माओवादीया सशस्त्र युद्धलिप जक उकी गति काःगु दाबी यानादिल । बिहिवाः तक न्ह्याइगु सम्मेलनय् थीथी पीस्वंगू देय्या स्वसः स्वयां अप्व प्रतिनिधितय्सं ब्वति कयाच्वंगु दु ।