सहमति मजुसाः एमालेनापया सरकार
एकीकृत नेकपा (माओवादीं) राष्ट्रिय सहमतिया सरकार गठन जुइमफुसाः नेकपा (एमाले( सहितया सरकार गठन यायेगु तयारी यानाच्वंगु दु ।
संविधानसभाय् दुथ्याःगु चिचीधंगु दलनाप आइतवाः जूगु सहलहलय् माओवादीं थःपिनिगु न्हापांगु प्राथमिकता राष्ट्रिय सहमतिया सरकार गठन यायेगु जुसां सहमति मजुसाः एमाले सहितया सरकार गठन यायेगु खँ धाःगु खः ।
नेपाल मजदुर किसान पार्टी, जनता दल, सद्भावना (आनन्दीदेवी), समाजवादी दल, जनमुक्ति पार्टी लगायतया दलत नापया बैठकय् विशेष यानाः माओवादी व एमाले दथुइ जूगु स्वंगू बुँदे सहमतिया बारे सहलह जूगु खः ।
उखे माओवादी अध्यक्ष पुष्पकमल दाहाल 'प्रचण्डं' शान्ति प्रकृया भंग यायेगु कुतः जुयाच्वंगुलिं एमाले नाप सहमति यानाःगु खँ धयादीगु दु । पूण्यप्रसाद लुँइटेलं च्वयादीगु 'नेपाली जनआन्दोलनया ६ दशक' नांया सफू बिमोचन यानादिसें प्रचण्डं शान्ति प्रकृया भंग यायेत्यंगुलिं, अनमिनया म्याद तनेत व लडाकुतय्त विशेष समितिया मातहत हयेत एमाले नाप सहलह यानाःगु धयादिल ।
