सरकारी कदमं लोकतन्त्रय् आक्रमण याःगु कांग्रेसया निष्कर्ष
प्रधानसेनापति रुकमाङ्ग कटुवालयात स्पष्टिकरण माग याःगु सरकारी ज्यां लोकतन्त्रय् आक्रमण याःगु ठहर प्रमुख प्रतिपक्षी दल नेपाली कांग्रेसं याःगु दु । कांग्रेसं माओवादी कुनियतया शिकार नेपाली सेना जूगु ठहर यासें उकीया विरुद्ध सतक व सदनय् आन्दोलन यायेगु निर्णय याःगु दु । सरकारं प्रधानसेनापति रुकमाङ्ग कटुवाल नाप नागरिक सर्वोच्चतायात अनादर याःगु धासें स्पष्टिकरण माग यायेवं राजनीतिक संकट खनेदुगु दु ।
पार्टी ज्याकूथी मंगलवाः जूगु कांग्रेसया केन्द्रीय समितिया बैठकं थ्व निर्णय याःगु खः । बैठक लिपाः संचारकर्मीत नाप खँल्हानादिसें नेता गोविन्दराज जोशीं प्रजातान्त्रिक संस्थाय् आक्रमण जूगुलिं कांग्रेसं आः हाकनं संघर्ष यायेमाःगु ई वःगु ठहर याःगु खँ धयादिल । थौंया बैठकं माओवादीया आक्रमण व हस्तक्षेपया विरोध दक्वं दलयात दुथ्याकाः सतक व सदन आन्दोलन चर्के यायेगु खँ वयेकलं धयादिल । अथेहे सरकारं स्पष्टिकरण कायेगु निर्णय लित मकाःसाः सदन बहिष्कार यानातुंच्वनीगु खँ कांग्रेस प्रवक्त अर्जुननरिसंह केसी धाःगु दु ।
अथेहे कांग्रेसं परमाधिपति व सेनाया संरक्षक जूगुलिं राष्ट्रपतियात लिपा नं थंज्याःगु असंवैधानिक आक्रमण दिकेत इनाप याःगु दु । नापं कांग्रेसं माओवादी बाहेकया दलतनाप सहलहया निंतिं सर्वदलीय बैठक सःतूगु दु ।
