२१म्ह उम्मेदवारतय्सं नां लितकाल
नेपाली कांग्रेसया झिंनिक्वःगु महाधिवेशनय् स्वसः व खुइछम्ह नेतातय्सं उम्मेदवारी ब्यूगुली नीछम्ह नेतातय्सं थौं उम्मेदवारी लित काःगु दु ।
थौं सुथय् झिताः ई निसें निघौं तकया निंतिं उम्मेदवारी लित कायेगु क्वःछीनातःगु ईया दुने नीछम्हेसिनं नां लितकाःगु खः । नां लितकाःपिं मध्ये खुल्लां निम्ह, जनजाति पाखें निम्ह, मधेशी व मुस्लिम पाखें छम्ह-छम्ह व अञ्चलया उम्मेदवार पाखें झिंन्याम्ह दु । नेपाली कांग्रेसं थुखसिइ केन्द्रिय समितियात समावेशी दयेकेगु निंतिं नीन्याम्ह दुजःन समावेशी कोटा पाखें निर्वाचित जुइगु प्रावधान याःगु खः ।
म्हिग सभापतिया निंतिं सुशील कोइराला, शेरबहादुर देउवा व भीमबहादुर तामाङ, महामन्त्रीया निंतिं प्रकाशमान सिंह। विमलेन्द्र निधि व नरहरी आचार्यं उम्मेदवारी दर्ता याःगु खः । अथेहे दांभरिया निंतिं चित्रलेखा यादव व पद्मनारायण चौधरीं उम्मेदवारी ब्यूगु खः ।
