स्वंगू बुँदे सहमति कार्यान्वयन जुइगु खँय् प्रमया शंका
प्रधानमन्त्री माधवकुमार नेपालं एकीकृत नेकपा (माओवादी) व नेकपा (एमाले) दथुइ जूगु स्वंगू बुँदे सहमति कार्यान्वयन जुइगु खँय् शंका यानादीगु दु ।
एमाले संसदीय दलया ज्याकू सिंहदरवारय् थौं च्वंगु एमाले संसदिय दलया मुंज्याय् प्रधानमन्त्री नेपालं थ्वसिवें न्ह्यः पटक-पटक जूगु सहमति व सम्झौता एकीकृत माओवादीया हे हुनिं कार्यान्वयन जुइमफूगु धयादिसें थुगु सम्झौता नं कार्यान्वयन जुइगुलिइ शंका दुगु धयादिल । वय्कलं माओवादीं ल्वाभःया धाक मत्वतूतले व हत्या हिंसाय् लगेजुयाच्वंगु धासें सम्झौता कार्यान्वयन जुइगुलिइ शंका यानादील । व्य्कलं प्रधानमन्त्री चुनावया दौडं माओवादी पिहाँवयेधुंकूगु हुनिं कांग्रेसं नं सहमतिया निंतिं नां लितकायेमाःगु बिचाः प्वंकादिल ।
छगू मेगु प्रसंगय् प्रधानमन्त्री नेपालं अनमिनया म्याद तनेगु बिषयसं जूगु कचवंया हुनिं विदेशी राजदुततय्सं माओवादी लडाकु गकले तक क्यान्टोनमेन्टय् च्वनी धैगु न्ह्यसः तयेगु याःगु धासें थुकिं नेपाःया छवि अन्र्तराष्ट्रिय स्तरय् स्यनीगु धयादिल । तर थ्वहे मुंज्याय् ब्वति काःम्ह एमाले नायः झलनाथ खनालं धाःसा अनमिन साझा संस्था जूगु धयादिसें शान्ति प्रकि्रया तातुनाय् मथ्यंतले अनमियात लितछ्वयेमज्यूगु धयादिल । वय्कलं देय् अन्तरिम अवस्थाय् लानाच्वंगुलिं शान्ति प्रक्रिया छुं दिनं दुने तातुनाय् थ्यनीगु मखुसा भंग जुइगु दाबी यानादिल ।
