प्रधानसेनापतिं स्पष्टिकरण लःल्हातः

प्रधानसेनापति रुकमाङ्ग कटुवालं मंगलवाः सरकारयात स्पष्टिकरण लःलहाःगु दु । नेपाली सेनाया पाखें प्रधानमन्त्री व मन्त्रीपरिषदया ज्याकूथीइ थौं सुथय् पौने दश बजे स्पष्टिकरण दर्ता याःगु खः । ज्याकू चालेवं सेनापतिया कार्यालया सहायक रथी राजेन्द्र क्षेत्रीं स्पष्टिकरण लःल्हानादीगु खः । स्पष्टिकरणया बोधार्थ रक्षा मन्त्रालययात नं ब्यूगु खँ सीदुगु दु ।

थ्वस्वयां न्ह्यः सोमवाः सरकारया निर्देशन पालना मयाःगु धासें नीप्यघौ दुने स्पष्टिकरण लःल्हायेत प्रधानसेनापति कटवालयात पौ छ्वःगु खः । पौ बुझेयाये धुंकाः सेनापितं सेनाया वरिष्ठ अधिकारीत नाप सहलह याना स्पष्टिकरण लःल्हाःगु खः ।

मन्त्रीपरिषदया ज्याकूथीइ स्पष्टिकरण दर्ता जूगु रक्षा मन्त्रालयया प्रवक्ता श्रीधर प्रसाद पोखरें जानकारी बियादीगु दु । स्पष्टिकरण काःगुलिं सरकारप्रति आक्रोसित प्रधानसेनापति कटवालं स्पष्टिकरण पौलय् धासाः नायूगु भाषं लिसः छ्वःगु दु ।

सेनापतिया प्रस्टीकरणय् नागरिक सर्वोच्चता व निर्वाचित सरकारया निर्देशनयात थःम्हं न्ह्यावलें मानेयायेगु व स्पष्टिकरणया निंतिं ल्ह्वंगु विषय्लय् याःगु ज्यात लोकतान्त्रिक मुल्यमान्यता, जननिर्वाचित निकायं देयेकूगु कानुन व जननिर्वाचित सरकारया निर्देशन कथं हे जूगु खँ न्ह्यथंनातःगु दु ।

पौलय् सेनाया भर्ना विवादय् रक्षां ब्यूगु निर्देशन मानेमयाःगु धाःगु द्वपंलय् कटवालं सेनाया स्वीकृत दरबन्दी दुने हे च्वनाः भर्ना कायाःगु व दिकेत निर्देशन वःगु ईलय् प्रकृया न्ह्यने वनेधुंकूगु व थ्वस्वयां न्ह्यःनं थथेहे यानाः भर्ना कायेधुंकूगु खँ न्ह्यथंनातःगु दु ।

अथेहे च्याम्ह सहायकरथीतय्त अवकाश बीगू सरकारी निर्णयविरुद्ध सर्वोच्च अदालतं जारी याःगु अन्तरिम आदेशया सम्बन्धय् रक्षा मन्त्रालय नाप छुं नं कथंया समन्वय व निर्देशन बिना हे सहायकरथीतय्त पुर्नबहाली याःगु सम्बन्धय् स्पष्टिकरण माग याःगु खः । उकी सेनापति कटवालं सर्वोच्चया आदेश मन्यंसाः अवहेलना जुइ फुगुंलिं अदालतया आदेश कथं मन्त्रालयपाखें नं निर्देशन वइगु अपेक्षा याना उमित पुर्नबहाली यानाःगु खँ न्ह्यथंनातःगु दु ।

अथेहे न्याक्वःगु राष्ट्रिय खेलकुद धेंधेंबल्ला उल्लेज्या व छुं छुं कासाःत न्ह्याये धुंकूगु अवस्थाय् न्हूगु पुचःयात समावेश यागुलिं कासाःमितय् हे इच्छा कथं ब्वति मकाःगु खँ धाःगु दु । सेनापति कटवालं थ्व दक्वं ज्याये जननिर्वाचित सरकारया आदेशया अवज्ञा यायेगु व कानुनया बर्खिलाप वनेगु मनासाय मदुगु खँ नं स्पष्टिकरण पौलय् न्ह्यथंनातःगु दु ।

आइतवाः च्वंगु मन्त्रीपरिषदया बैठकं कटवालयात सरकारया निर्देशनया अवज्ञायासॆं नेपाली सेनाय् न्हूपिं जवानतय् भर्ना याःगु, च्याम्ह अवकास प्राप्त जर्नेलतय्त रक्षामन्त्रलयया जानकारी बिना पुनर्बहाली याःगु व राष्ट्रिय खेलकुद धेंधेंबल्ला बहिष्कारयाःगु धासे सरकारं स्पष्टिकरण बीत नीप्यघौया ई ब्यूगु खः ।

२००७ साललिपा सरकारं प्रधानसेनापतिया तप्यंकः लिखित स्पष्टिकरण माग याःगु थ्वहे न्हपांगु खुशी खः । प्रधानमन्त्रीं आइतवाः सेनापतियात सिंहदरवारय् सःताः राजीनामा बीत दबाब ब्यूगु खसां सेनापति कटवालं राजीनामा मबीगु धायेवं सरकारं स्पष्टिकरण माग याःगु खः ।