थनिनिसें कांग्रेसया महाधिवेशन
येँ (सन्ध्या टाइम्स)/नेपाली कांग्रेसया झिंनिक्वःगु महाधिवेशन थनिनिसें शुरु जूगु दु। येँया खुल्लामंचय् कांग्रेसया कार्यवहाक सभापति सुशिल कोइरालां उलेज्या यानादीगु कांग्रेसया थुगु महाधिवेशन वइगु ५ गते तक जुइ ।
थौं उद्घाटन समारोह क्वचाये धुंकाः कन्हय् निसें भृकुटी मण्डपय् बन्दशत्र जुइ। बन्द शत्रय् पार्टी विधान नापं नीतिगत खँय् सहलह जुइ। अनंलिपा ५ गते नेपाल प्रज्ञा प्रतिस्थानय् न्हूगु नेतृत्वया नितिं चुनाव जुइ। थुगुसीया चुनाय् कांग्रेसया कार्यवहाक सभापति सुशिल कोइराला, वरिष्ठ नेता शेरबहादुर देउवा व केन्द्रीय दुजः भीमबहादुर तामाङ सभापतिया उम्मेदवार जुया थःथःगु ब्यागलं ब्यागलं कथं प्यानल दयेकूगु दु। कोइरालां महामन्त्रीइ प्रकासमान सिंह, कोषाध्यक्षय् पद्मनारायण चौधरी, देउवां महामन्त्रीइ विमलेन्द्र निधि, कोषाध्यक्षय् चित्रलेखा यादव अले तामाङं महामन्त्रीइ नरहरी आचार्ययात उम्मेदवारया रुपय् घोषणा याःगु दु ।
कांग्रेसया इतिहासय् हे न्हापांखुसि महामन्त्री व कोषाध्यक्षया नं चुनाव जुइ त्यंगु खः। न्हापा जूसा पार्टीया सभपतिं हे महामन्त्रीनिसें फुक्क कथंया पदाधिकारीत मनोनित याइगु प्रावधान तयातःगु खः। थुगुसीया महाधिवेशनय् कांग्रेसया नेतातय्सं आदिवासी जनजाति, ल्यूने लानाच्वंगु समुदयया हक अधिकारया नितिं नीतिगत रुपं छुं न्हूगु खँ हयाच्वंगु मदुसां स्वम्ह हे सभापतिया उम्मेदवारतय्सं थःथःगु प्यानलया पदाधिकारी समावेशी प्यानल धकाः क्यनेगु कथंया उम्मेदवारी घोषणा याःगु दु ।
