तिंख्यः कुचा यानाः पार्किङ तइगु?

येँ (सन्ध्या टाइम्स)/राजधानी येँ देशय् ल्यनाच्वंगु छगूयां छगू हे जक तःधंगु खुल्ला लागा तिंख्यःयात अझ अतिक्रमण यानाः चिकू याना यंकेगु ग्वसाः येँ महानगरपालिकां यानाच्वंगु खँ सीदुगु दु। स्वनिगःया ट्राफिक समस्या समाधान यायेत एडीबी व येँ मनपां जानाः न्ह्याकेत्यंगु छगू परियोजना कथं तिंख्यःयात टुक्रा यानाः अन गाडी पार्किङ्ग यायेगु थाय् दयेकेत्यंगु खँ विज्ञ सूत्रं धाःगु दु ।

सूत्रं बिउगु जानकारी कथं एडीबी व येँ मनपा जानाः 'सस्टेनेबल ट्रान्सपोर्ट मेनेजमेन्ट' धइगु नामं थ्व परियोजना न्ह्याकेत्यंगु खः। थ्व खास यानाः स्वनिगलय् सार्वजनिक सवारी साधनयात प्राथमिकता बियाः निजी सवारी साधन म्हो याना यंकेगु ताः तयाः न्ह्याकेत्यंगु परियोजना खः। उगु परियोजनाय् तिंख्यःयात कुचा यानाः अन दुने गाडी पार्किङ्ग यायेगु थाय् दयेकेगु प्रस्ताव दुथ्याः। लिसें तिंख्यः ध्वाखांनिसें तिंख्यः दथुं हे छपु लँ दयेका यंकेगु बारे नं बिचाः जुयाच्वंगु दु ।

तर तिंख्यःयात थथे पार्किङ्गस्थल दयेकीबलय् थुकिं राजधानीइ ल्यनाच्वंगु छकूयां छकू जक खुल्ला लागा नं नष्ट जू वनीगु खँ विज्ञतय्सं धाःगु दु। उकिसनं तिंख्यःया थःगु हे धार्मिक, सांस्कृतिक महत्व नं दु। लिसें स्वनिगःया लुँहिति लगायत मेमेगु नं ल्वहं हितिया मुहान अन क्वं हे वनाच्वंगु खँ नं धायेगु याः। तिंख्यःया बछि स्वयां अप्वः ब्व नेपाली सेनां कब्जा याना तयेधुंकूगु दु ।

विज्ञ मनूतय्सं धाः कथं तिंख्यः धइगु न्हापा लानि पुखू कयाः उखे त्रिपुरेश्वर तक छस्वाः खः। लिपा सहिदगेट दयेकेत तिंख्यःयात निकू कुचा यानाः तःधं तिंख्यः व चीधं तिंख्यः दयेकूगु खः। वयां लिपा चीधं तिंख्यःयात नं कुचा यानाः दशरथ रंगशाला दयेकेगु ज्या जुल। थौंकन्हय् चीधं तिंख्यः नं सेनां कब्जाय् कयाः अन छुं हे नक्सा पास तकं मयासे ततःखागु छेँ, क्लब व फुटबल म्हितेगु थाय् दयेकेगु ज्या यानाच्वंगु दु ।

स्वनिगःया ट्राफिक समस्या ज्यंकेगु लागिं मनपां हस्ताक्षर यायेत्यंगु उगु परियोजनाया मेमेगु पक्ष धाःसा लसकुस यायेबहः जूगु खँ नं धाःगु दु ।