मोटरसाइकल दुर्घटनाय् निम्ह सित
येँ (सन्ध्या टाइम्स)/यल व नलपरासीइ वंगु चान्हय् जूगु ब्यागलं ब्यगलं कथंया मोटरसाइकल दुर्घटनाय् लाना निम्ह मनूत सीगु दु। यलया सातदोबाटों नखुपाखे वनाच्वंगु बा ३५ प ७९६२ नम्बरया मोटरसाइकल एकान्तकुनाया यातायात व्यवस्था कार्यालय न्ह्यःने दुर्घटना जुया मकवानपुरया कुलेखानी च्वंम्ह २७ दँ दुम्ह सन्तोष घलान सीगु दु। चान्हय् लँजुवाःयात ठक्कर नकेवं अथे दुर्घटना जूगु खःसा लँजुवाः सु खः धकाः आः तक नं सीके फुगु मदुनि। अथे हे पूर्वपश्चिम राजमार्ग अन्तर्गत नवलपरासीया गैंडाकोट लागाय् मोटरसाइकलं ट्रकयात ठक्कर नका मोटरसाइकल चालक सीगु दु। दिकातःगु ट्रकय् ठक्कर नका मोटरसाइकल चालक बुद्धिबहादुर पौडेल सीगु खः ।
