मुक्त कमैयापाखें चक्का जाम
येँ (सन्ध्या टाइम्स)/ मुक्त कमैया समाजं थौं दाङ नापं मध्यपश्चिमया न्यागू जिल्लाय् चक्काजाम याःगु दु ।
न्हापाया सरकारलिसे जूगु सहमति कार्यान्वयनया नितिं दवावकथं थौं समाजं अथे चक्काजाम याःगु खः। चक्का जाम याःगुलिं दाङनापं बाँके, बर्दिया, कैलाली व कन्चनपुर जिल्लाया जनजीवन प्रभावित जूगु दु। दाङय् छुं छुं सवारी साधन संचाल जूगु दुसा मेमेथाय् धाःसा ठप्प हे जूगु दु।
म्हसीका पौ दयेधुंकूपिं मुक्त कमैयाया परिवारयात क्वःछिनातःगु इलय् हे पुनःस्थापना यायेमाःगु, माःगु कथंया बासया ब्यवस्था यायेमाःगु नापं थीथी कथंया माग याना अथे इमिसं थौं चक्काजाम आह्वान याःगु खः। प्रेस, एम्बुलेन्स नापं मदयेकं मगाःगु यातायात धाःसा संचालनयात पंगः थनागु मदु धकाः समाजं धाःगु दु ।
समाजं थुगु आन्दोलनयात न्हापांगु चरणया आन्दोलन धकाः धाःगु दुसा म्हिगः जक मुक्त कमैया समाजं दाङया प्रमुख बजारय् मसाल जुलुस पिकाःगु खः ।
