दुर्गालालया 'इलं हाःगु म्ये' पिदनीगु
येँ (सन्ध्या टाइम्स)/जनकवि दुर्गालाल श्रेष्ठया च्वसां पिदंगु नेवाः जागरण सम्बन्धी म्येँत मुनातःगु न्हूगु एल्बम 'इलं हाःगु म्येँ' कन्हय् शनिवाः छगू ज्याझ्वःया दथुइ विमोचन जुइत्यंगु दु ।
जनकवि दुर्गालाल श्रेष्ठया च्वसां सलंसः म्येँ पिदने धुंकूगु दुसा नेवाः आन्दोलनया झ्वलय् चिनातःगु म्येँ 'लसय् हंगु विरोध'यात छगू ज्वः मदुगु सांगीतिक एल्बमया रुपय् कया तःगु दु। आः वयाः हाकनं छक्वः उज्वःगु हे जागरणया सः थ्वयेकेभनं वय्कःया न्हूगु एल्मब 'इलं हाःगु म्येँ' पिदनेत्यंगु खः ।
थुकी नेपालभाषाया दक्व धइथें नांजाःपि गायक गायिकापिनि सः दुथ्यानाच्वंगु दु। झिम्ह थीथी संगीतकारतसें लसय् हना तःगु थ्व एल्बम धर्मसेवक व समाजसेवक सुचित्रमान शाक्यया कुतलं पिदनेत्यंगु खः। नेवाः जागरण मञ्चया कवः नेवाः जागरण संकिपा मञ्चं थुकिया बजाः व्यवस्थापन याइगु खँ दुसा कन्हय् जुइगु ज्याझ्वः नं संकिपा मंचं हे ग्वसाः ग्वःगु खः ।
कन्हय् जुइगु तःजिगु ज्याझ्वलय् नेवाः सभासदतय्गु ल्हातिं उगु एल्बमया विमोचन जुइत्यंगु दुसा ज्याझ्वःया मूपाहां कथं संस्कृतिविद् व नेपालभाषा एकेडेमीया चान्सलर सत्यमोहन जोशीयात ब्वनातःगु दु। नेपालभाषा संगीत ख्यलय् थुकथंया जागरण म्येँ पिमदंगु यक्व दयेधुंकूगु व थुकी लोकंह्वाःपिं आपालं गायकपिंसं तसकं बांलाक म्येँ हालातःगु जुयाः 'इलं हाःगु म्ये' संगीतह्यःमिपिनि निंति न्हू सवाः जुइगु जक मखुसें सकसिगुं नुगः त्याके फइगु विचाः पिकाक सुचित्रमान शाक्यं प्वंकादीगु दु ।
