स्पष्टिकरणबारे कांग्रेसं राष्ट्रपतिया ध्यानाकर्षण
प्रधानसेनापति रुकमाङ्ग कटुवालयात स्पष्टिकरण माग यासें चीकेगु सरकारी पलाखँ शान्ति प्रकृया स्यंकेफूगु धासें प्रमुख प्रतिपक्षी दल नेपाली कांग्रेसं चिन्ता प्वंकूगु दु ।
सेनया परमाधिपति नापं जुम्ह राष्ट्रपति डा. रामवरण यादवयात मंगलवाः सुथय् नापलानाः कांग्रेस नेतातय्सं राष्ट्रिय सेनाय् माओवादी हस्तक्षेप बारे ध्यानाकर्षण यासें चिन्ता प्वंकूगु दु । कांग्रेस कार्यवाहक सभापति सुशिल कोइराला सहितया पुचलं राष्ट्रपति निवास वनाः प्रधानमन्त्रीयात सेना चलॆ मयायेत इनाप यायॆत राष्ट्रपतियात सुझाव बियादिल ।
थ्वहे विषययात कयाः कांग्रेस केन्द्रीय दुजःतय् आपतकालिन बैठक च्वनाच्वंगु दु । सरकारया लिप्पांगु निर्णयपाखें सरकार व सेनाःया स्वापू अझ ख्वाँउइगु, सेनाया मानेबल कुहांवइगु व थुकीं समग्र शान्ति प्रक्रियायात हे प्रभाव लाकीगू निष्कर्ष पिकाःगु दु । केन्द्रीय दुजःतय् बैठक धुनेवं माओवादी बाहेकया दलत नाप कांग्रेसं सहलह याइगु जूगु दु ।
सेनां सरकारया आदेश अवज्ञा याःगु धासें रक्षामन्त्रालयं प्रधानसेनापति नाप नीप्यघौया दुने लिसः बीत स्पष्टिकरण फ्वंगु खः । स्पष्टिकरण सरकारयात चित्तबुझे मजूसाः प्रधानसेनापतियात अवकाश बीगू तयारी सरकारं यानाच्वंगु दु ।
