कांग्रेसया झिंनिक्वःगु महाधिवेशन सुरु
नेपाली कांग्रेसया झिंनिक्वःगु महाधिवेशन थनिंनिसें येँय् सुरु जूगु दु । थौं छगू तःजिगु ज्याझ्वःया दथुइ येँया खुल्लामञ्चय् कांग्रेस कार्यवाहक सभापति सुशील कोइरालां झिंनिक्वःगु महाधिवेशनया उलेज्या यानादीगु खः ।
ज्याझ्वलय् नेपाली कांग्रेसया वरिष्ठ नेतात निसें निर्वाचन प्रतिनिधित नापं प्रधानमन्त्री माधवकुमार नेपाल, सभामुख सुभासचन्द्र नेम्वाङ, एनेकपा (माओवादी)या अध्यक्ष पुष्पकमल दाहाल 'प्रचण्ड', नेकपा (एमाले)या अध्यक्ष झलनाथ खनालया ब्वति दुगु खःसा भारतीय नेतातय् नं अन ब्वति दुगु खः ।
सभायात सम्बोधन यानादिसें कांग्रेस कार्यवाहक सभापति सुशील कोइरालां कांग्रेसं स्वतन्त्रताया निंतिं सुं नाप नं सम्झौता मयाइगु धयादिल । वय्कलं कांग्रेस गवलें नं पुलिं मचुइगु धयादिसें माओवादीं ल्वाभः त्वताः वाईसीएल भंग याःसा प्रचण्ड प्रधानमन्त्री जुसां आपत्ति मदुगु धयादिल ।
कांग्रेस वरिष्ठ नेता शेरबहादुर देउवां कांग्रेसं न्ह्यावलें नं देशय् जूगु परिवर्तनया नेतृत्व यानाच्वंगु धयादिल । वय्कलं संसदय् निगूगु थासय् लानाच्वंगु कांग्रेसयात आः थःम्हं दकलय् तःधंगु दल दयेकीगु दावी यानादिल ।
अथेहे मेम्ह कांग्रेस नेता रामचन्द्र पौडलं प्रजातन्त्रय् सम्झौत यानाः सरकार गठन मजुइगु धयादिल । वय्कलं माओवादीं ल्वाभः त्वःतुगु घोषण यायेवं थःम्हं प्रधानमन्त्रीया निर्वाचन पाखें उम्मेदवारी लितकायेगु धयादिल ।
प्रधानमन्त्री माधवकुमार नेपालं राजनीतिक दलत दथुइया मतभिन्नता क्वचायेकेमाःगु धयादिल । वय्कलं एमालेया इनापय् माओवादीं प्रधानमन्त्री उम्मेदवारी लितकाःगु धयादिसें आः उम्मेदवारी लितकायेगु पाः कांग्रेसया जूगु धयादिल ।
अथेहे सभामुख सुभासचन्द्र नेम्वाङं कांग्रेसया न्ह्यने सहमति, सहकार्य व एकता हाथ्याया कथं वःगु धयादिसें उगु सिद्धान्तयात आत्मसाथ यायेफुसाः जक गिरिजाप्रसाद कोइराला प्रति श्रद्धाञ्जली जुइगु धयादिल ।
माओवादी अध्यक्ष प्रचण्डं गिरिजाप्रसाद कोइराला व थः मिले जुयाः शान्ति प्रकृया न्ह्याकूगु धयादिल । वय्कलं सहमतिया निंतिं थःम्हं प्रधानमन्त्रीया रेस त्वताःगु धयादिसें आः थुकीया बारे समिक्षा यायेगु जिम्मा कांग्रेस महाधिवेशनया जूगु धयादिल ।
एमाले अध्यक्ष झलनाथ खनालं राजनीतिक दलत छप्पँ जुयाः न्ह्याः वनाः तःधंगु उपलब्धीत चूलाःगु खँ लुमंकादिसें छप्पँ जुयाः वंसाः दक्वं गतिरोधया समाधान यायेफइगु धयादिल ।
ज्याझ्वलय् उपप्रधानमन्त्री नापं फोरम लोकतान्त्रिकया अध्यक्ष विजयकुमार गच्छदार, सद्धभावना अध्यक्ष नापं आपूर्ति मन्त्री राजेन्द्र महत्व, नेकपा (माले)या महासचिव सीपी मौनाली, राष्ट्रिय जनमोर्चाया अध्यक्ष चित्रबहादुर केसी, राप्रपा नेपालया अध्यक्ष कमल थापा लगायतं न्ववानादीगु खः ।
न्यान्हु तक न्ह्याइगु महाधिवेशनया निंतिं थीथी जिल्लाया स्वद्ववं व च्ययेम्ह प्रतिनिधित येँय् वःगु खः । महाधिवेशनया कार्यतालिका कथं असोज २ गते उम्मेदवारी दर्ता यायेगु, ३ उम्मेदवारी लितकायेगु व उम्मेदवारया लिप्पांगु नामावली पिथनीगु ज्याझ्वः दुसाः मतदान ५ गते जुइ ।
