थौ विश्वकर्मा पूजा तःजिक हनाच्वन

थौ असोज महिनाया न्हापांगु दिं । यातायात व कारखानाय् ज्या याइपिं मजदुरतय्सं मेसिन व ज्याभः पूजा याना विश्वकर्मा पुजा न्यायेकाच्वंगु दु । विश्वकर्मा पूजा यातधाःसा छुं कथंया अप्रिय घटना मजुइमा धकाः मेसिनया पूजा यायेगु चलन दु । येँ नापं देय्या थीथी थासय् च्वंगु उद्योग व कारखानाय् थौं मजदुरतय्सं झःझः धायेका उत्साहपूर्वक विश्वकर्माया पूजा यानाच्वंगु दु । थौं औद्योगिक क्षेत्रय् ज्या याइपिं मजदुरतय्त बिदा बिइगु चलन दु । उद्योगी व श्रमिक दथुइया थःथवय् सम्वन्ध बल्लाकेत थुगु दिंयात महत्वपूर्ण अवसरया रुपय् कयातःगु दु । श्रमिकं श्रमया द्यः कथं विश्वकर्माया पूजा याइ । थःगु ज्या यायेगु ज्याभः उपकरण व यातायातया साधनया पूजा यायेगु हे थौंया दिंया विशेषता खः । पौराणिक बाखं कथं विश्वकर्मायात वास्तुया काय् कानेयानातःगु दु । पौराणिक युगया फुक्क राजधानी बाबा विश्वकर्मां निर्माण याःगु जनविश्वास दु । सत्य युगया स्वर्गलोक त्रेता युगया लंका द्वापर युगया द्वारिका फुक्क थासय् विश्वकर्माया कला कियातःगु धार्मिक मान्यता दु । थ्वहे विश्वासय् आः नं धनधान्य व सुख समृद्धिया चाहना याइपिंसं विश्वकर्माया पूजा याइ ।