प्रचण्डं उम्मेदवारी लितकाइगु
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' प्रधानमन्त्रीया उम्मेदवारी लितकाइगु जूगु दु ।
येँया गौरीधारया छखाः छेँय् माओवादी व नेकपा (एमाले) दथुइ शुक्रवाः सुथय् जूगु बैठकय् माओवादी अध्यक्ष प्रचण्डं उम्मेदवारी लितकायेगु सहमति जूगु खः । निगूलिं दलया शीर्ष नेतातय् ब्वति दुगु बैठकय् उम्मेदवारी लितकायेगु नापं स्वंगू बुँदे सहमति जूगु दु ।
सहमति कथं राष्ट्रिय सहमतिया आधारं प्रधानमन्त्री ल्ययेत प्रचण्डं उम्मेदवारी लितकायेगु व जारी निर्वाचन प्रकृया ब्वति मकायेगु व वर्तमान प्रकृया क्वमचातले एमालें नं निर्वाचन प्रकृयाय् ब्वति मकाइगु जूगु दु ।
सहमति लिपा निगूलिं दलया नेतातय्सं कांग्रेसं नं उम्मेदवारी लितकाइगु विश्वास प्वंकूसें आः न्हूगु तरिकां सहमति मालेत लँपू चाःगु प्रतिकृया ब्यूगु खः । बैठकय् माओवादी अध्यक्ष प्रचण्ड, उपाध्यक्षत डा. बाबुराम भट्टराई व नारायणकाजी श्रेष्ठ 'प्रकाश' व एमाले पाखें अध्यक्ष झलनाथ खनाल नापं प्रधानमन्त्री माधवकुमार नेपाल लगायत नेतातय् ब्वति दुगु खः ।
