माओवादी लडाकू विशेष समिति मातहत
एकीकृत नेकपा (माओवादी)या लडाकूत सेना समायोजन विशेष मातहत वःगु दु । बिहीवाः बहनी च्वंगु विषेश समितिया बैठकं लडाकूतय् रेखदेख, नियन्त्रण, निर्देशन प्रक्रिया व आचारसंहिता समबन्धी निर्देशिका, २०६७ पारित यायेवं लडाकूत विषेश समिति मातहत वःगु खः ।
पारित निर्देशिका कथं लडाकूतय्सं समिति वा समितिं क्वःछिनातःगु निकाय व मनूया निर्देशन पलना यायेमाः । अथेहे रेखदेख, समायोजन, पुनर्स्थापना व शान्ति प्रकृयायात प्रतिकुल जुइगु अभिव्यक्ति सञ्चारमाध्यमय् बीमदुगु व्यवस्था याःगु दु । नापं आर्थिक ग्वाहालिया निंतिं चन्दा कायेमदइगु व्यवस्था नं याःगु दु ।
अथेहे शिविर दुने राजनीतिक प्रशिक्षण यायेमदइगु, पार्टीया ध्वाँय् तयेमदइगु, नेतातय् किपा तयेमदइगु लगायत प्रावधान दुथ्याकातःगु दु । प्रधानमन्त्रीया अध्यक्षताय् सिंहदरवारय् च्वंगु बैठकय् समितिया दक्वं दुजःतय्सं ल्हाःचिं तयेवं निर्देशिका पारित जूगु खः ।
बैठकं आः च्याम्ह दुजः दुगु प्राविधिक समितियात हे विषेश समिति मातहत सचिवालयया कथं पलिस्था यायेगु व उकी नेपाली सेना, नेपाल प्रहरी, सशस्त्र प्रहरी व माओवादी लडाकूया छम्ह-छम्ह दुजः तनेगु खँ क्वःछिउगु दु ।
