कन्हय् निसें कांग्रेस महाधिवेशन
कन्हय् निसें नेपाली कांग्रेसया झिंनिक्वःगु महाधिवेसन शुरु जुइत्यंगु दु । न्यान्हु तक न्ह्याइगु महाधिवेशनया निंतिं दक्वं तयरी क्वचाःगु खँ धाःगु दु । महाधिवेशनया निंतिं थीथी जिल्लाया स्वद्ववं व च्ययेम्ह प्रतिनिधित थौं येँय् थ्यंक वःगु दु । प्रतिनिधितय्त च्वनेत लुँहिति, बागबजाः, पुलांगु बसपार्क, गौशाला क्षेत्रय् व्यवस्था यानातःगु दुसाः उगु क्षेत्रय् म्हिग बहनी निसें हे सुरक्षा निगरानी अप्वयेकूगु दु ।
महाधिवेशनया निंतिं निर्वाचन समितिं निर्वाचन कार्यतालिकाया व मतदाता धल नं पिथनेधुंकूगु दु । महाधिवेशनया मतादानया निंतिं सच्छि व खुइगू बुथया व्यवस्था याःगु दु । मतदाताया ल्याः अप्वःगुलिं निर्वाचन समितिं यक्वः बुथ क्वःछिउगु खः । कार्यतालिका कथं असोज २ गते सुथय् ८ बजे निसें १२ बजे तक उम्मेदवारी दर्ताया ई क्वःछिनातःगु दु ।
असोज ३ गते सुथसिया ७ बजे निसें ८ बजे तक उम्मेदवारी लितकायेगु व १० बजे लिपा उम्मेदवारीया लिप्पांगु नामावली पिथनी । मतदान ५ गते सुथय् ८ बजे निसें ४ बजे तक जुइ । मतदान यायेगु ई क्वचायेवं न्हापांगु चरणय् सभापतिया मत गणना शुरु जुइ ।
सभापतिया मतगणना क्वचायेवं महामन्त्री, दांभरी व दुजःतय् मत गणना याइगु खँ समितिं धाःगु दु । मतदानय् सभापति, महामन्त्री, दांभरी खुला केन्द्रीय दुजः, अञ्चल दुजः व समावेशी दुजःया निंतिं ब्यागलं ब्यागलं मत पत्र तयार याःगु खँ निर्वाचन समितिं धाःगु दु ।
महाधिवेशन सुरक्षाया निंतिं द्वछि व स्वसः सुरक्षाकर्मी खटे जुइ । महाधिवेशनया ई दुने विशेष सुरक्षा रणनीति कथं तालिम प्राप्त खिचा तकं छ्यलीगु जूगु दु ।
