कांग्रेसं संसद बहिस्कार
प्रमुख प्रतिपक्ष दल नेपाली कांग्रेसं सोमवाः च्वंगु संसदया बैठक बहिष्कार याःगुलिं बैठक झिगू मिनेट नं मच्वंसें स्थगित जूगु दु ।
निन्हय् च्यातात्याः ईलय् च्वंगु बैठक शुरु जुइवं नेपाली कांग्रेसया उपसभापति रामचन्द्र पौडेलं माओवादीं न्हापा याःगु सहमति उल्लंघन याःगु धासें बैठक बहिष्कार यायेगु घोषणा याःगु खः । माओवादीं थःगु पह मिभंकूतल्ले संसद चलेजुइ मबीगु धाःगु दु । पौडेलं सेना, न्यायलय, प्रेस दक्व ख्यलय् माओवादीं आक्रमण यानाच्वंगु धयादिल ।
कांग्रेसया सभासद्तयसं बैठक बहिष्कार याना पिहांवनेवं सभामुख सुभाषचन्द्र नेम्वाङं सोमवाःया बैठक स्थगित जूगु जानकारी बियादीगु खः । सोमवाःया बैठकय् थीथी खुगू विधेयक व निगू प्रतिवेदन न्ह्यब्वइगु ग्वसाः ग्वयातसां ज्या शुरु जुइ न्ह्यःहे बैठक स्थगित जूगु खः । स्थगति संसदया बैठक मंगलवाः न्हिनय् हाकनं च्वनी ।
