पोष्टर, जुलुस, भ्वासि पहः बन्द
कांग्रेस महाधिवेशन
येँ (सन्ध्या टाइम्स)/नेपाली कांग्रेसया झिंनिक्वःगु महाधिवेशनया नितिं प्रचार प्रसार ज्याझ्वःयात तिब्रता बिउगु दु। कांग्रेसं थुगुसी पोष्टर तिकेगु ज्यायात निषेधित यानाः प्रचार प्रसार यानाच्वंगु दु ।
प्रचार प्रसारया झ्वलय् थौं किपुली मोटरसाइकल र्याली याःगु दु। येँ जिल्ला निर्वाचन क्षेत्र नं. १० या ग्वसालय् पिकाःगु उगु मोटरसाइकल र्यालीं कन्हय् जुइगु कांग्रेस महाधिवेशनया प्रचार याःगु खः ।
मोटरसाइकल र्याली नयाँबजार, किपू, पांगा नापं थाय्थासय् चाःहिउगु खः। अथे हे थौं नेपाली कांग्रेसया भ्रातृ संगठन नेपाल विद्यार्थी संघं येँय् महाधिवेशन प्रचार र्याली पिकाइगु जूगु दु। थौं न्हिनय् १ बजेनिसें येँया शान्ति बाटीका लागां उगु र्याली पिकायेत्यंगु खः ।
उकथं हे थौं प्रचार प्रसारया नितिं थाय्थासय् थीथी कथंया ज्याझ्वः जुइगु खँ नेपाली कांग्रेस येँ जिल्ला समितिया सभापति भिमसेनदास प्रधानं कनादीगु दु। थुगुसी प्रचार प्रसारया झ्वलय् थाय्थासय् ब्यानर तयेगु, होरिङ बोर्ड तयेगु, कांग्रेसया ध्वाँय् ब्वयेकेगु ज्या जक यानागु तर पोष्टर तिकेगु ज्या मयानागु खँ नं वय्कलं कनादिल ।
पोष्टर तिकेगु ज्यां नगर फोहोर जुइगु नापं संविधानसभाया चुनाव तकं अज्याःगु ज्या मयाकूगु कारणं नेपाली कांग्रेसं थःपिं नं उदाहरण जुयाः क्यनेमाः धकाः केन्द्रीय रुपं हे पोष्टर तिकेगु ज्याय् प्रतिबन्ध तःगु खः।
नेपाली कांग्रेसया न्यान्हु तक जुइगु झिंनिक्वःगु महाधिवेशन कन्हय् खुल्लामञ्चय् छगू तःधंगु ज्याझ्वःया दथुइ उलेज्या जुइ। न्हिनसिया २ बजे उलेज्या ज्याझ्वः दु। अधिवेशनया लागिं जुलुस पिकाल धाःसा ट्राफिक जाम जुयाः जनतायात सास्ती जुइ धकाः कन्हय् कांग्रेसं जुलुस नं मपिकायेगु व तप्यंक हे खुल्लामञ्चय् सभा यायेगु ज्याझ्वः दयेकूगु दु ।
