येँया एसपी खरेलयात चेतावनी
येँ (सन्ध्या टाइम्स)/येँया प्रहरी प्रमुख रमेश खरेलयात महानगरीय आयुक्तया ज्याकुथिं ख्याच्वः कथं 'ध्यानाकर्षण' पौ बिउगु दु। खरेलं प्रहरीया परम्परा व अनुशासनया चेन अफ कमाण्ड हाचांगायाः च्वय्या निकायय् च्वंपिं अधिकृततय्गु आलोचना याना जूगु द्वपं बिसें उगु चेतावनी पौ बिउगु खः। आयुक्तया ज्याकुथी ज्या यानाच्वंम्ह छम्ह नायव निरीक्षकं गलत ज्या याःगु ज्याया बारे एसपी खरेलं महानगरीय प्रहरी प्रमुख मदन खड्कायात छुं नं जानकारी मबिसे तप्यंक हे प्रहरी प्रमुख महानिरिक्षक रमेश चन्दयाथाय् वना गुनासो याःगु जुयाच्वन। तप्यंक च्वय्या निकायय् वनाः याःगु अज्याःगु गुनासोयात प्रहरी प्रमुखं नं म्वाःमदुगु ज्या धकाः तायेकेवं खरेलयात ख्याच्वः पौ बिउगु खः ।
आयुक्तया ज्याकूपाखें खरेलयात थ्व सिबें न्ह्यः नं येँय् आपराधिक घटना अप्वया वयाच्वन धकाः सचेत यासें ध्यानाकर्षण पौ बिउगु खः। आयुक्तया ज्याकुथिं खरेलयात बिउगु पौया बोधार्थ प्रहरी महानिरीक्षकया सचिवालय व प्रशासन विभागयात नं बिउगु दु ।
