राष्ट्रपति-प्रधानमन्त्री दथुइ खँल्हाबंला

राष्ट्रपति रामवरण यादव व प्रधानमन्त्री पुष्पकमल दाहाल प्रचण्ड दथुइ सोमवाः खँल्हाबंला जूगु दु ।

सोमवाः न्हिनय् राष्ट्रपति भवन शितल निवासय् जूगु खँल्हाबंलाय् प्रधानमन्त्री दाहालं प्रधानसनेपति रुकमाङ्ग कटुवालयात सरकारं काःगु स्पष्टिकरण बारे राष्ट्रपति यादवयात जानकारी बियादीगु खः । प्रधानमन्त्री दाहालं सरकारया आदेशया पालना मयाःगु धासें सेनापतियात स्पष्टिकरण काःगु खँ धयादीगू ख: ।

सरकारी निर्णयया अवज्ञा याःगु धासें रक्षामन्त्रालयं प्रधानसेनापति कटुवालयात नीप्यघौ दुने स्पष्टिकरण बीत माग याःगु खँयात कया सहलह यायेत प्रधानमन्त्री दाहाल राष्ट्रपतियात नापलायेत शितल निवास झायादीगु खः । थ्यंमथ्यं पीन्याःगू मिनेट जूगु खँल्हाबंलाय् देय्या लिपांगु घटनाक्रमया बारे नं खँ जूगु खः ।