भारतीय दलाली याःगु कारणं गतिरोध मज्यंगू : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' राजनीतिक दलतय्सं भारतीय दलाली स्वीकार याःगु कारण राजनीतिक गतिरोध ताःहागु खँ धयादीगु दु ।
राष्ट्रिय स्वाधीनता व नेपाली क्रान्ति विषयसं बिहीवाः येँय् जूगु अर्न्तक्रियाय् अध्यक्ष दाहालं संविधानसभा पाखें दकलय् तःधंगु दल जूगु माओवादीयात स्वीकार यायेमफइगु दलत भारतीय दलाली यानाच्वंगुलिं गतिरोध ज्यंकेत थाकूगु धयादिल ।
वय्कलं चुनावय् जनतां स्वीकार याःगु दलयात मेमेगू दलं स्वीकार मयाःगु कारणं आः स्वंगू करोड जनता सहित लिप्पांगु युद्ध यायेगु ख्याच्वः बियादिल । वय्कलं माओवादी धैर्यताया साथ शान्ति व संविधान च्वयेगु निंतिं संघर्षय् दुगु धयादिसें राष्ट्रियता व राष्ट्रिय स्वाधिनताया निंतिं आन्दोलन यायेगु धयादिल । वय्कलं राष्ट्रियता बचे यायेत नेपाःया संचार ख्यलं महत्वपूर्ण भूमिका म्हिता च्वंगु नं धयादिल ।
ज्याझ्वलय् मधेसी जनअधिकार फोरमया सभासद् अभिषेकप्रताप शाहं राष्ट्रियताया आन्दोलन न्हापा हे मधेश पाखें जूगु धयादिसें हानं नं मधेशं हे आन्दोलन न्ह्याकेमाःगु धयादिल । अथेहे ज्याझ्वलय् सिमाविद् बुद्धिनारायण श्रेष्ठ, साहित्यकार खगेन्द्र संग्रौलालगायतं राजनीतिक दलत राष्ट्रियता स्वयां नं दलगत स्वार्थय् लगे जूगुलिं राष्ट्रिय स्वाधीनता खतराय् लाःगु द्वपं ब्यूगु खः ।
