जि हे संस्थापन पक्ष : देउवा
नेपाली कांग्रेसया वरिष्ठ नेता नापं झिंनिक्वःगु महाधिवेशनय् सभापति पदया प्रत्याशी शेरबहादुर देउवां थः हे संस्थापन पक्ष जूगु दावी यानादीगु दु ।
कांग्रेस महासमिति दुजः व महाधिवेशन प्रतिनिधिया सम्मानय् बिहीवाः येँय् ग्वसाःग्वःगु ज्याझ्वलय् देउवां गिरिजाप्रसाद कोइराला लिपा थः पार्टीया संस्थापन पक्ष जूगु धयादिल । वय्कलं संस्थापन पक्षया हवला बियाः सुशील कोइराला पक्षं मखूगु द्वपं बियाच्वंगु धयादिसें अज्याःगु पक्षं पार्टीइ विभाजन हयेत स्वःगु द्वपं नं बियादिल ।
महाधिवशेन लिपा पार्टीयात प्रजातिन्त्रक प्रक्रियापाखें न्ह्याकेगु प्रतिवद्धता प्वंकादिसें नेता देउवां कांग्रेसयात दकलय् तःधंगु व समावेशी पार्टी दयेकेगु दावी यानादिल ।
उगु हे ज्यझ्वालय् देउवा प्यानल पाखें उपसभापतिया प्रत्याशी गोपालमान श्रेष्ठ, महामन्त्रीया प्रत्याशी विमलेन्द्र नीधि व दांभरीया प्रत्याशी चित्रलेखा यादवं पार्टीयात परिवारवाद व हैकमवादपाखें मुक्त यायेमाःगु बिचाः प्वंकादीगु खः ।
