पार्टीया गलत नीतिया हुनिं प्रधानमन्त्री ल्ययेमफुगु : गजुरेल
एकीकृत नेकपा (माओवादी)या सचिव सीपी गजुरेलं थःगु हे पार्टीया गलत नीतिया हुनिं न्हय्क्व तकया चुनावापाखें नं प्रधानमन्त्री ल्ययेमफुगु खँ धयादीगु दु ।
येँय् बिहीवाः जूगु छगू साक्षात्कार ज्याझ्वलय् वय्कलं पार्टीया छु नीतिया कारणं अध्यक्ष पुष्पकमल दाहाल 'प्रचण्ड' प्रधानमन्त्री ल्ययेमफुगु स्पष्ट किटान यानामदीसां त्रुटिया बारेय् धाःसा पार्टी दुने समिक्षा जुयाच्वंगु धयादिल ।
नेता गजुरेलं पार्टी दुनेया अन्तर विरोध व बाह्य हस्तक्षेपया कारण संविधान निर्माण याये मबीगु कासा जूगु व संविधानसभा निष्क्रिय दयेकेत स्वःगु द्वपं बियादिल । वय्कलं राजनीतिक निकासया निंतिं पहल न्ह्याकेधुंकूगुलिं असोज १० गते न्ह्यः हे निकास पिकायेत माओवादी प्रधानमन्त्रीया चुनावपाखें लिचिलेफुगु नं धयादिल ।
बिहीवाः हे जूगु मेगू छगू साक्षात्कार ज्याझ्वलय् मेम्ह माओवादी नेता देव गुरुङं राष्ट्रपतिं अनावश्यक रुपं सेना छ्यलाः राष्ट्रपति शासन लागू यायेगु तयारी यानाच्वंगु द्वपं बियादिल । नापं वय्कलं सरकार व थःगु पार्टी दथुइ अनमिनया बिषयलय् सहमति जूगु इलय् सेनाया अति आवश्यक बन्दबस्तीया ज्वलँ हयेगु जक सहमति जूगु धयादिल । वय्कलं सेना भर्नाया बारे छुं नं सहमति मजूगु धयादिसें संचार माध्यमतय्सं सहमतिया बुँदायात तोडमोड यानाः मखूगु कथं बुखँ पिथंगु द्वपं नं बियादिल ।
