राष्ट्रसंघीय महासभाय् ब्वति कायेत नेपालं न्याम्ह वनीगु

राष्ट्रसंघीय महासभाय् ब्वति कायेत प्रधानमन्त्री सहितया जम्बो पुचः वनीगु बारे थीथी ख्यलं कुंखिनेवं आः नेपालं न्याम्ह जकया पुचः वनीगु जूगु दु । बुधवाः सनिलय् च्वंगु मन्त्रिपरिषदया बैठकं महासभाय् गृहमन्त्री भीम रावलया नेतृत्वय् नेपालं न्याम्ह वनीगु व न्युयोर्कस्थित राष्ट्रसंघीय मिसन पाखें स्थायी प्रतिनिधि ज्ञानचन्द्र आचार्य लगायत खुम्हेसिनं ब्वति कायेगु निर्णय याःगु खः ।

महासभाय् नेपालं गृहमन्त्री रावल नापं महासभाया नायः पदया उम्मेदवार कुलचन्द्र गौतम, परराष्ट्र सचिव मदन भट्टराई, सहसचिव दुर्गा भट्टराई, प्रधानमनत्रीया विदेश सल्लाहकार राजन भट्टराई व राष्ट्रिय योजना आयोगया उपाध्यक्ष जगदिशचन्द्र पोखरेलं ब्वति कायेगु क्वःछिउगु दु ।

सेप्टेम्बर २० निसें २२ तक जुइत्यंगु महासभाय् नेपाःया पाखें गृहमन्त्री रावलं सम्बोधन यानादी ।