सहमतिय प्रकृया असफल : कोइराला
नेपाली कांग्रेसया कार्यवाहक सभापति सुशील कोइरालां सहमतिय प्रकृया असफल जूगुलिं बहुमतिय प्रकृया पाखें हे प्रधानमन्त्री ल्ययेमाःगु खँ धयादीगु दु । वय्कलं बहुमतीय प्रकृया पाखें प्रधानमन्त्री ल्यये धुंकाः लिपाः सहमतिलय् वनेफइगु धयादिल ।
गोरखापत्र संस्थान कर्मचारी संघं, २०५२या कार्यसमितिं गिरिजाप्रसाद कोइराला मदुगु खुलाः व कांग्रेसया झिनिक्वःगु महाधिवेशनया लसताय् पिकागु 'उचाई सफुया बुधवाः येँय् उलेज्या यानादिसें वय्कलं न्हूगु सरकारया नेतृत्व कांग्रेसं हे याइगु दावी यानादिल ।
कोइरालां शान्ति प्रकृयायात क्वचायेत कांग्रेसं जक फइगुलिं सरकारया नेतृत्व कांग्रेसं हे यायेमाःगु धयादिल । वय्कलं माओवादी व एमालें नेतृत्व याःगु सरकार असफल जुइधुंकूगुलिं आः कांग्रेसया नेतृत्वय् सरकार गठनया निंतिं ग्वाहालि यायेत इनाप यानादिल ।
वय्कलं नेपाली कांग्रेसं शान्ति प्रकृया व संविधान निर्माण यायेत प्रधानमन्त्रीया उम्मेदवारी लितमकायेगु नं धयादिल ।
