लडाकूतय्त विशेष समिति मातहत हइगु
एकीकृत नेकपा (माओवादी)या लडाकूतय्त सेना समायोजन विशेष समिति मातहत हयाः सेना समायोजन व पुनर्स्थापनाया ज्या न्ह्याकीगु जूगु दु ।
बुधवाः सुथय् च्वंगु सेना समायोजन विषेश समितिया बैठकय् लडाकूतय्त विषेश समिति मातहत हयाः ज्या न्ह्याकीगु सहमति याःगु खः । बैठकय् प्यलाःया दुने समायोजन व पुनर्स्थापनाया ज्या क्वचायेकेत असोज १ निसें ज्या न्ह्याकीगु खँ क्वःछिउगु दु । अथेहे अनमिनया थप याःगु म्यादया क्वचाये न्ह्यः हे समायोजन व पुनर्स्थापना प्रकृया क्वचायेकीगु बारे सहलह जूगु खः ।
सिंहदरवारस्थित प्रधानमन्त्रीया ज्याकूथी च्वंगु बैठकय् माओवादी लडाकूयात सेना, प्रहरी व मेगू छुछु सुरक्षा निकायलय् समायोजन यायेगु बारे सहलह जूगु खःसां उकी छुं सहमति जुइमफुत ।
उखे राष्ट्र संघया सुरक्षा परिषदया बैठकं थौं अनमनिया म्याद प्यलाया निंतिं थप याइगु जूगु दु । सरकार व माओवादीं सुरक्षा परिषदयात प्यलाःया निंतिं म्याद थप यायेत पौ छ्वःगु आधारय् थौं म्याद थप यायेत्यंगु खः ।
