थौं बाल दिवस
'सबैको सरोकार-नयाँ संविधानमा सुनिश्चित बालअधिकार' धइगु नारा नाप थौं राष्ट्रिय बाल दिवस हन ।
बाल दिवसया लसताय् थौं राष्ट्रपति डा. रामवरण यादवं मस्त नाप खँल्हाबंला यानादिल । राष्ट्रपति यादवं लोकतान्त्रीक पद्धतीयात राज्यं छ्यलेमफूगु कारणं मस्तयेगु संरक्षित अधिकार व्यवहारय् हयेमफूगु धयादिल । राष्ट्रपति भवनय् येँ जिल्ला बाल कल्याणं याःगु ज्याझ्वलय् राष्ट्रपति यादव नाप मस्तय्सं थःगु अधिकार बारे न्ह्यसः ल्वह्वंगु खः ।
उगु इलय् राष्ट्रपति यादवं मस्तय्गु न्ह्यसःया लिसः बियादिसें मस्तयेगु ख्यलय् खनेदुगु समस्यायात राज्यं सम्बोधन यायेमाःगु धयादिल । सामाजिक मान्यता व अन्तराष्ट्रिय कानुन कथं संविधानय् मस्तयेगु अधिकार सुनिश्चित यायेमाःगु नं वय्कलं धयादिल ।
नीदँ न्ह्यः संयुक्त राष्ट्रसंघं मस्तयेगु सम्बन्धी महासन्धीया अनुमोदन याःगु दिं १४ सेप्टेवरयात वंगु प्यदँ न्ह्यःनिसें नेपालं न राष्ट्रिय बालदिवसया रुपय् हनावयाच्वंगु दु ।
छुगू तथ्याङक कथं थीथी झिंनिगू क्षेत्रय् ज्या यानाच्वंपिं झिंप्यंगू निसें स्वीप्यंगू प्रतिशत मस्त जोखिमय् लाःगु दु । घरेलु बालश्रम, इटाभट्टा, मसाज केन्द्र, क्याविन रेष्टुरेन्ट, गलैंचा कारखाना, इम्ब्रोडरी आदि थासय् बाल श्रमय् आवद्ध मस्त यौन पेसाय् दुथ्याःगु खनेदु ।
