माधव नेपालं प्रस्ताव तःगु मदु : खनाल
नेकपा (एमाले)या नायः झलनाथ खनालं प्रधानमन्त्री माधवकुमार नेपालं प्रधानमन्त्री जुइत थःगु न्ह्यःने स्वंगु सर्त मतःगु खँ धयादीगु दु । थौं पार्टी मुख्यालय बल्खुइ बेलायती राजदूत जोन टकनट नाप जूगु खँल्हाबंला लिपा नायः खनालं उगु बुखँ मखूगु दाबी यानादिल । वय्कलं धयादिल, 'थ्व सत्य खँ मखु ।'
छुं दिं न्ह्यः प्रधानमन्त्री माधवकुमार नेपालं खनालयात प्रधानमन्त्री दयेकेत वामदेव गौतमयात कारवाही याना न्वकू पदं चीकेमाःगु, थःयात कार्यवाहक नायःया जिम्मा बिइमाःगु व केपी ओलीयात सभासद् दयेकेमागु स्वंगु सर्त तगु बुखँ सार्वजनिक जूगु खः ।
थ्वस्वयां न्ह्यः राजदूत टकनट नाप जूगु खँल्हाबंलाय् नायः खनालं बहुमतया कासां शान्ति व संविधान धरापय् लागू धयादिसें एमाले हाकन गल्ती यायेगु पक्षय् मदुगु धयादिल । राजदूत टकनटं धाःसा याकन सहमति याना सरकार गठन यायेत इनाप यानादीगु खः ।
राजदूत टकनटं म्हिगः सरकार व माओवादी दथुइ अनमिनया म्याद तनेगु लगायत शान्ति सम्झौता सम्वन्धी प्यंगू बुंदाय् जूगु सहमतियात नं लसकुस यानादिल ।
