केन्द्रीय सदस्यया उम्मेदवारत फुक्क हे स्वतन्त्र
उपसभापतिया लोभ क्यनाः सुजाताया नां लित कायेकल
येँ (सन्ध्या टाइम्स)/वइगु १ गतेनिसें जुइगु नेपाली कांग्रेसया झिंनिक्वःगु महाधिवेशनय् स्वंगू प्यानलं उम्मेदवारी बिउगु दुसां केन्द्रीय सदस्यय् उम्मेदवारी बिउपिं सकस्यां हैसियत धाःसा स्वतन्त्र जुइगु खँ धाःगु दु।
महाधिवेशनया निंतिं सुशिल कोइराला, शेरबहादुर देउवा व भीमबहादुर तामाङ यानाः स्वंगू आधिकारिक प्यानल सार्वजनिक जुइधुंकूगु दु। थुगुसी न्हापांखुसी कांग्रेसया महामन्त्री व कोषाध्यक्ष पदया नितिं नं चुनाव जुइत्यंगु खः ।
नेपाली कांग्रेसया परम्परा कथं केन्द्रीय सदस्यत दुनें दुनें छुं विशेष प्यानलनाप स्वापू दुसां चुनाव प्रचारय् धाःसा प्यानलया नां मकासे थःत जक मत बियादिसँ धकाः स्वतन्त्र रुपं अभियानय् लगे जुयाच्वंगु दु।
थुुगुसी केन्द्रीय सदस्य पदय् यक्व हे उम्मेदवार जूगु दुसा गुलिं उम्मेदवारतय्सं ब्यागलं सम्पर्क ज्याकू चायेकाः तकं प्रचार यानाच्वंगु दु ।
थ्वहे दथुइ महामन्त्री पदय् उम्मेदवारी बियादीम्ह उपप्रधान एवं परराष्ट्र मन्त्री सुजाता कोइरालां थःत सुशिल कोइरालां उपसभापति दयेकेगु बचं बिउगुलिं उम्मेदवारी लित कायेत्यनागु खँ कनादीगु दु। वय्कःया उम्मेदवारीं यानाः कोइराला परिवार दुने हे कचवं पिहां वयेधुंकूगु खः। वय्कलं सुशिलं धायेक धायेक हे महामन्त्रीइ उम्मेदवारी बियादीगु खः ।
