सरकारपाखें प्रधानसेनापतियाके स्पष्टिकरण माग
सरकारं प्रधानसेनापति रुकमाङ्ग कटुवालयाके स्वंगू विवादास्पद खँया बारे स्पष्टिकरण माग याःगु दु ।
आइतवाः च्वंगु मन्त्रीपरिषदया बैठकं प्रधानसेनापति कटुवाल नाप नेपाली सेनाय् न्हूपि जवानतय् भर्ना, अवकाश प्राप्त च्याम्ह सैनिक जर्नेल व न्याक्वःगु राष्ट्रिय खेलकूद धेंधेंबल्ला बहिष्कार याःगु विषयलय् स्पष्टिकरण माग याःगु दु ।
मन्त्रीपरिषदया बैठकलिपा रक्षामन्त्रालयं सोमवाः प्रधानसेनापति कटवालया नांमय् छगू पौ च्वसें सम्बन्धित विषयलय् नीप्यघौ दुने स्पष्टिकरण बीत माग याःगु खः ।
सीदु कथं माओवादी नेतृत्वया सरकारं प्रधानसेनापति कटवालयात अवकाश बीगू निंतिं स्पष्टिकरण माग याःगु खः । सैनिक कानुन कथं यदि प्रधानसेनापितं नीप्यघौ दुने स्पष्टिकरण मब्यूसाः वा सरकारयात स्पष्टिकरण चित्त बुझे मजूसाः सरकारं प्रधानसेनापतिया अवकाश बीफइ । कानुन कथं प्रधनासेनापतिया समयावधि स्वदँया निंतिं जुइगु खसां सरकारं मासाः वयात न्ह्यावलें नं अवकाश बीफू तर प्रधानसेनापतियात सम्बन्धित विषयलय् स्पष्टिकरण बीगू ह्वताः धासाः बीमाः ।
आइतवाः सुथय् प्रधानमन्त्री पुष्पकमल दाहाल प्रचण्डं प्रधानसेनापतियात स्वेक्षिक अवकाश बीत इनाप याःगु खसां प्रधानसेनापितं थुकीयात अस्वीकार याःगु खः ।
थ्वेहे झ्वलय् सोमवाः राष्ट्रपति रामवरण यादव व प्रधानमन्त्री दाहाल दथुइ खँल्हाबंला जुइगु जूगु दु । राष्ट्रपति भवनय् निन्हे निताः ईलय् जुइगु खँल्हाबंलाय् प्रधानसेनापतिया अवकाश व देय्या समसामयिक विषयलय् खँ जुइगु जूगु दु ।
