व्यापारी ज्वंगु विरोधय् बजाः बन्द

येँ (सन्ध्या टाइम्स)/कपिलवस्तुया कृष्णनगरय् विष्फोटक पदार्थ हयेगुली स्वापू दुगु आशंकाय् अनया स्वम्ह ब्यापारीतय्त प्रहरीं ज्वंगु विरोधय् स्थानीय व्यापारीतय्सं थौं सुथंनिसें हे अनया बजाः बन्द याना बिउगु दु। बजाः बन्द आह्वान यानातःगुलिं कृष्णनगरय् पूर्ण रुपं बजाः बन्द जूगु दु। भारतपाखें फलफूल हयाः येँ नापं थाय् थासय् आपूर्ति यानाः वयाच्वंपिं व्यापारीत धनञ्जय सिंह, रियाज अहमद व दिलीप यादवयात म्हिगः प्रहरीं ज्वंगु खः। फलफूलया गाडीइ विस्फोटक पदार्थ लुया वःगुलिं अथे इमित ज्वनाः अनुसन्धान यानाच्वनागु दु धकाः स्थानीय प्रहरीं धाःगु दु। अनया उद्योग वाणिज्य संघं ज्वंपिं स्वम्ह व्यापारीतय्त थःपिनिगु जिल्लापिने यंकूगुलिं हे उकिया विरोध यायेमाःगु खः धकाः न्ह्यथंगु दु। विष्फोटक पदार्थ हयेगुली स्वापू दुगु आशंकाय् ज्वंपिं इपिं स्वम्हं ब्यापारीत वंगु झिंन्यादँ न्ह्यःनिसें फलफूल ब्यापार याना वयाच्वंपिं खः ।