चालक स्याःगु विरोधय् यातायात बन्द
येँ (सन्ध्या टाइम्स)/सुर्खेतया राकम धइगु थासय् बस चालक ओकिल बुढाथोकीयत स्याना बिउगु विरोधय् थौं सुथंनिसें अखिल नेपाल यातायात मजदुर संघं मध्यपश्चिमय् यातायात बन्द आह्वान याःगु दु। अथे बन्द आह्वान याःगुलिं सुर्खेत, दैलेख, जाजरकोट व सल्यान सल्लीबजा लागाय् चले जुइगु यातायात ठप्प हे जूगु दु ।
म्हीग आइतवाः सुर्खेत रकम गाविस वडा नं. २ या गजौडाय् दिकातःगु बसया तलय् मचा दुहां वनाच्वंगु मसिया गाडी न्ह्याकेत्यंगु इलय् बसया तलय् च्वंम्ह स्वदँ दुम्ह मचा बसं क्यलाः सीगु खः। मचा सीवं स्थानीय मनूतय्सं ना. ३ ख ६६५१ नम्बर बसया चालक बुढाथोकीयात दायाः स्यानाः भेरी खुसिइ कुर्का छ्वःगु खः ।
उगु घटनाय् स्वापू दुपिंत ज्वनाः कारवाही मयाःगुलिं हे थःपिंसं यातायात बन्दया आह्वान यानागु खँ बन्दकर्तातय्सं धाःगु दु ।
