साहित्य तःमुँज्या ग्वसाः खलः स्वन

ख्वप (सन्ध्या टाइम्स)/वइगु कौलाथ्व द्वादशि व त्रयादशि निन्हुयंकं ख्वपया कुथुबहिली जुइगु स्वीक्वःगु नेपालभाषा साहित्य तःमुँज्या व सांस्कृतिक ब्वज्या ताःलाक न्ह्याकेत स्थानीय १७ वडाया पुलांम्ह वडा अध्यक्ष लक्ष्मीनारायण राजलवत खत्रीया अध्यक्षताय् स्वीक्वःगु नेपालभाषा साहित्य तःमुँज्या ग्वसाः खलः नीस्वन। समितिइ अम्बिका न्याइच्याई, विष्णु प्रजापति, विष्णुभक्त कोजू, रमेश न्याइच्याई, विश्वराज शिल्पकार, श्रीकृष्ण न्याइच्याई, कान्छा खत्री, राजन कोजू, कृष्णप्रसाद कोजू, हरिकृष्ण भैल, श्यामकृष्ण खत्री, पुण्यराम बाइजु, लक्ष्मीभक्त खत्री, लक्ष्मीसुन्दर सुवाल, कृष्णबहादुर दुगुजू व श्यामसुन्दर वाटी च्वनादीगु दु ।

थ्वहे झ्वलय् सनिवाः थुगुसी जुइगु स्वीक्वःगु तःमुँज्याय् न्ह्यब्वयेगु साहित्य व सांस्कृतिक विधायात कयाः नेमकिपा अध्यक्ष नारायणमान बिजुक्छें प्रशिक्षण बियादिल। ख्वपया आपालं न्हूपिं पुलांपिं च्वमि व कलाकारतय् मुँज्याय् वय्कलं च्वयेगु विषय, च्वयेगु तरिका व स्पष्ट यायेगु शैली बारे ध्वाथुइकादीगु खः। वय्कः स्वयम् नं हरिबहादुरया नामं च्वयादीम्ह छम्ह साहित्यकार खः। नेपालभाषा साहित्य तःमुँज्या मूगुथिं ग्वसाः ग्वःगु ज्याझ्वलय् मूगुथिया नायः चन्द्रबहादुर उलकं नं न्ववानादिल ।