नेपालभाषाया गुम्ह विद्यार्थीयात मोतिलानी सिरपाः

येँ(सन्ध्या टाइम्स)/नेपालभाषा विषय कया ब्वनाच्वंपिं विद्यार्थीत मध्ये एसएलसींनिसें एमए तकया तगिमय् उत्कृष्ट जूपिं विद्यार्थीतय्त बीगु यानाव वयाच्वंगु मोतिलानि सिरपाः म्हिगः छगू समारोहया दथुइ थीथी तगिंयापिं गुम्ह विद्यार्थीयात लःल्हात ।

नेपाल संवत् १११५ सं पलिस्था यानाः १११६ निसें सिरपाः बीगु शुरु याःगु मोतिलानी सिरपाः थुगुसी झिंप्यक्वःगु खः। वंगु दँय् मोतिलानी ताम्राकार मदुगुलिं बी मफयाः थुगुसी झिंप्यक्वःगु कथं जक सिरपाः लःल्हाःगु खः।
मदुम्ह ताम्राकारयात श्रद्धाञ्जली देछासें न्ह्याकूगु उगु ज्याझ्वलय् मू पाहां नेपालभाषा परिषदया नायः फणिन्द्ररत्न बज्राचार्यं सिरपाः लःल्हानादीगु खः। ज्याझ्वः मोतिलानी सिरपाःया नायः हितकरवीरसिंह कसाःया सभापतित्वय् जूगु खः। ज्याझ्वलय् एसएलसी तगिमय् दकलय् अप्वः ल्याः हयाः पास जूम्ह सजेन महर्जन (२०६४), रिना बज्राचार्य (२०६५) व रोशन महर्जन (२०६६) यात उगु सिरपाः बिउगु खः। अथे हे आइएपाखे रश्मी नापित (२०६४) व विक्रम गैंजु (२०६६), बिएपाखे अनिलरत्न बज्राचार्य (२०६५) व शान्ति महर्जन (२०६६) एम ए तगिमय् हरिकृष्ण डंगोल (२०६५) व सानुराजा शाक्य (२०६६) यात सिरपाः लःल्हाःगु खः।
ज्याझ्वलय् मोतिलानी ताम्राकारया काय सुवर्ण ताम्राकारं मोतिलानी सिरपाःया कोषयात छगू लाख तका दां तनेगु घोषणा यानादीगु खः। ज्याझ्वलय् सिरपाःया संस्थापक नायः डा. सुन्दरकृष्ण जोशीं नेपालभाषायात आः तक नं राज्यं मान्यता मबिउनिगुलिं हे नेपालभाषा कयाः ब्वनीपिं ब्वँमित म्हो जुयाच्वंगु खँ कुलादिल ।

ज्याझ्वलय् नेपालभाषा मंकाः खलःया नायः पद्मरत्न तुलाधर, पुलांम्ह मन्त्री प्रेम बहादुर शाक्य, जनकवि दुर्गालाल श्रेष्ठ व संयुक्त राष्ट्र संघया पुलांम्ह उपमहासचिव कुलचन्द्र गौतमं नं पाहां कथं ब्वति कयादीगु खःसा मोतीलानी सिरपाःया न्वकु नापं नेपालभाषा केन्द्रीय विभागया प्रमुख प्रा. प्रेमशान्ति तुलाधरं लसकुस न्वचु बियादीगु खः।बियादीगु खः।