कुमारीया क्वःनेयाः झःझः धाइगु जुल
'झीगु क्वःनेयाः, झीगु नखःचखः हे झीगु म्हसीका' खः धइगु नारा थ्वयेकाः थुगुसी कुमारीया क्वःनेयाः भव्य रुपं सफल याइगु जूगु दु। क्वःने लाःगु स्थानीय जैशिदेवल युथ क्लबं क्वःनेयाः ताःलाकेत ५०१ म्ह दुजः दुगु 'श्री इन्द्रजात्रा तथाः क्वःनेयाः व्यवस्थापन समिति' समेत नीस्वंगु दु। समितिया नायः पुलांम्ह वडाध्यक्ष जुजुकाजी तण्डुकार जुयादीगु दुसा उपसंयोजकय् महेन्द्र कर्माचार्य च्वनादीगु दु ।
क्लबपाखें कुमारी, गणेश, भैरव नापं लाखे आजु, पुलुकिसि, होल्चो आकाश भैरव गण, ख्वपया महाकाली, नरदेवीया प्याखं गणयात समय्द्वँ छायेगु लिसें सकलें सांस्कृतिक पुचःयात झःझः धायेक लसकुस यानाः जात्रायात तःजिक सम्पन्न यायेगु ताः तःगु दु। क्लबपाखें वंगु प्यदँ न्ह्वंनिसें मदिक्क थथे द्यःगणयात समय्द्वँ देछायेगु ज्या यानाच्वंगु दु ।
थुगुसीया जात्रा तःजिक न्यायेकेगु लागिं उकुन्हु छगू सहलह मुँज्या नं जूगु खः। सहलहया उलेज्या सभासद् ध्यान गोविन्द रंजितं यानादीगु खः। ज्याझ्वलय् क्लबया नायः नापं ज्याझ्वःया सभापति राजेश प्रजापतिं झीगु नखःचखः व झीगु तजिलजियात म्वाका तयेगु व समाजय् वयाच्वंगु विकृति न्हंका छ्वयेगु मू आज्जु ज्वनाः थुगु ज्याझ्वः न्ह्याकागु खँ कनादिल। नापं वय्कलं थुगुसी नेपाली सेनाया छगू टुकडीपाखें बिगुल पुइकाः श्री कुमारी, श्री भैरव व श्री गणेशया रथयात लसकुस यायेगु ग्वसाः दुगु खँ नं कनादिल ।
