थुगुसी नं ख्यालिगुलु पर्यटन बोर्ड हलय्
दँय्दसं थें सापारुया लसताय् ख्यालिगुलु गुथिपाखें न्यायेकेगु याना वयाच्वंगु ख्यालिन्हिलि ज्याझ्वः थुगुसी नं नेपाल पर्यटन बोर्डया हलय् याइगु जूगु दु ।
थ्वहे वइगु यंलागा दुतिया (असोज ९ गते) शनिवाः कुन्हु उगु ज्याझ्वः यायेगु खँ क्वःछिउगु खः। थ्व स्वयां न्ह्यः थुगुसीया ख्यालिन्हिलि ज्याझ्वः राष्ट्रिय सभागृहय् यायेगु धकाः तयारी जूगु खःसां हल खाली मदयाः थगुने थें थुगुसी नं पर्यटन बोर्डया हलय् तुं ज्याझ्वः यायेत्यनागु खँ गुथिं न्ह्यथंगु दु ।
थुगुसीया ज्याझ्वलय् नं चिचीहाकःगु ख्यालः, हुलाप्याखं, हास्य म्ये, जादू, मुक्तक आदि न्ह्यब्वयाः ज्याझ्वः झःझः धायेकीगु खँ धाःगु दु ।
ज्याझ्वलय् सदां थें स्वकुमिपाखें हे सभापति ल्ययेगु व स्वकुमिपाखें हे मू पाहां ल्ययेगु ज्या जुइ। अले डोर प्राइज कथं छुं स्वकुमिपिंत गोला प्रथापाखें ल्वःवनापुसे च्वंगु सिरपाः देछायेगु ज्या नं जुइ ।
बरु थुगुसी ख्यालिगुलु गुथिं न्हिला कर धाःसा न्हापा स्वयां बढे याःगु दु। थुगुसी न्हिला कर प्रति व्यक्ति ९९ तका तोके याःगु दु। उकिया कारणय् गुथिया नायः गणेशराम लाछिं धयादी, 'बजारय् समय्बजिया भाः थहां वन नि, अय् जुयाः का, मेतां मखु ।'
